Warden wa manumbaling sa pagsaway gikan Tomas
Gibaliwala lang sa bag-ong warden sa Operation Second Chance, Inspector Merlina Metante, ang pagsaway nga iyang naangkon gikan kang Mayor Tomas Osmeña.
Una nang gihulagway sa mayor nga walay kalainan si Metante sa gihulipan niining si Sr. Insp. Jennifer Joyce Abar nga
Apan inay maluya, gihimong inspirasyon ni Metante ang pagsaway ni Osmeña alang sa pagpamatuod nga nasayop ang mayor sa giluwatan niining pamahayag.
“I have to do my job, trabaho man lang ning amo, we have to prove nga we are capable of doing our job regardless kung unsay comment sa mga tawo,”sumala sa warden.
Si Metante maoy gihulip nga warden diha sa Operation Second Chance human moeskapo ang pito ka mga minor de edad diha sa nahisgutang pasilidad pipila ka semana na ang nakalabay.
Ang mga minor de edad mipasangil nga dili na nila maantos ang pangabuso sa pipila ka mga guardiya sa sentro hinungdan nga sila nangiskapo.
Pipila ka adlaw human sa ilang pag-ikyas, nasikop ra hinuon pagbalik ang maong mga batan-on sa mga guwardiya nga nangita kanila.
Apan gusto sa kagamhanan sa dakbayan nga ibalhin og laing pasilidad ang mga minor de edad ug dili na ibalik diha sa Operation Second Chance.
Ang korte mipagawas na og release order sa pito ka mga batan-on niadtong miaging semana, apan hangtod karon kini nagpabilin gihapon diha sa nahisgutang pasilidad.
Gani si Konsehal Gerardo Carillo nibahad pagpasaka og tukmang kaso batok sa warden ug sa mga guwardiya sa sentro kung kini mapakyas pag-release sa mga batan-on niining semanaha.
Apan matud ni Metante nga dunay sayop ang case number sa duha ka mga minor de edad hinungdan nga kini iyang gipakurihian.
Gipasalig ni Metante nga kung mahibalik na ang release order, ila gilayong ipagawas ang pito ka mga minor de edad diha sa Operation Second Chance.
- Latest
- Trending
