Nagtoo si Cebu City Vice Mayor Michael Rama nga ang nahitabong “stand-off” sa Makati City dili maoy katapusang kalihukan paglumpag sa administrasyon.
Kini samtang duna pay mga tawo nga wala matagbaw sa pamunuan ni Presidente Gloria Macapagal Arroyo.
Alang kang Rama ang gihimo nila ni Senador Antonio Trillanes IV, Brigadier General Danilo Lim ug kaubanan, nagpakita sa ilang kasagmuyo sa gobiyerno.
“Basta duna pa gani mga unsettled question dili gyud ka kalikay sa mga tawo nga naay conviction, mo-feel gyud og aggrieve,” sumala sa bise mayor.
Gitataw hinoon ni Rama nga angayang manubag ang senador ug kaubanan sa kahasol nga nahimo niini sa publiko ug sa gobiyerno.
Gipadayag sa bise mayor nga nakahatag og epekto ang gihimo ni Trillanes dili lang sa kahusay ug kalinaw lakip na sa ekonomiya sa nasod.
Wala hinuon mobasol si Rama sa senador ug kaubanan sa gihimo niining lakang pagpadayag sa ilang sentimiyento batok sa administrasyon.
Gani niingon si Rama nga panahon na nga tan-awon sa mga namunuan ang ilang pagdumala sa kagamhanan samtang dili pa uwahi ang tanan.
“Naa gyuy mga reflection nga pagabuhaton, daghan man gong mga panghitabo, mga kontrobersiya nga until now sigi pa og imbestigar,” nagkanayon si Rama.
“Unsa may assurance nga ang nahitabo sa Manila Peninsula dili na masubli sa umaabot nga mga panahon,” dugang pasabot sa bise mayor.
Taliwa niini, mapasalamton lang gihapon si Rama tungod kay natapos ang “stand-off” nga malinawon ug walay kinabuhi nga nakalas.