Liddawa suspensohon tungod way disiplina

Mipagawas na sa rekomendasyon nga suspensuhon og 45 ka adlaw si Sr.Insp. Jose Liddawa Jr., kanhi hepe sa Subangdaku police station sa dakbayan sa Mandaue kinsa giingong mikulata ug nakulatahan sa crew sa ABS-CBN niadtong milabay’ng semana.

Si Chief Supt. Ronald Roderos, ang deputy director for administration sa Police Regional Office 7 mitug-an sa mga tigbalita nga gipasa na ni Sr. Supt. Rodel Calungsod, director sa MCPO ang rekomendasyon diha sa Regional Investigation and Detective Management Division.

Matud pang Roderos kini wala’y labot sa insidenteng pagkulata ug pagkakulata kang Liddawa tali sa news crew pinanguluhan ni Ramil Paican ug duha ka cameraman niadtong hitaboa.

Sumala pang Roderos, ang suspension girekomendar human nakitang duna gyuy basehanan si Calungsod batok kang Liddawa aron pasakaan kini og reklamong administratiba nga grave misconduct.

Si Sr. Supt. Arturo Evangelista, hepe sa RIDMD mitug-an sa mga tigbalita kagahapon nga sa nakitang gibuhat ni Liddawa diha sa video footage, nakumbinsir silang duna gyuy “breech of internal discipline.”

Bisan paman wala mosang-at og pormal nga kasong administratiba ang ABS-CBN batok ni Liddawa awtomatikong mahimong complainant si Calungsod ug ang PNP regional headquarters maoy mohimo sa imbestigasyon batok sa maong opisyal tungod sa pagkawalay disiplina niini.

Giklaro ni Evangelista nga ang usa ka polis, magpabiling polis matulog man o dili, hubog man o dili. Nunot niini silang mga polis gipaabot nga disiplinado sa bisan unsang panahon ug sitwasyon.

Samtang gipasabot ni Evangelista nga ang preventive suspension dili usa ka silot, kundili usa lang ka pamaagi sa PNP aron dili makapangimpluwensya ang giakusahan sa dagan sa kaso ug aron dili kini makapang-harass sa mga testigos ug reklamante.

Gibutyag usab ni Evangelista nga kun matapos na sa Regional Human Resource Development Division (R1) ang paghikay sa rekomendasyon sa kaso ni Liddawa si Chief Supt. Silverio Alarcio,Jr. na maoy modesider kun aprubahan ang suspension o dili.

Gidugang ni Evangelista nga ang kinatibuk-ang video footage nga bag-uhay lang gipagawas sa ABS-CBN niadtong Huwebes ug kagahapon sa buntag gikatahong mahimong gamiton sa summary hearing officer pabor o dili kang Liddawa.

Sa pagkakaron wala pa mahikay ang kaso kabahin sa pagpanumbag ni Liddawa sa news crew diha sa PRO-7, apan ang ABS-CBN misang-at na sa ilang kaugalingong kasong kriminal batok sa maong opisyal.

Si Leo Lastimosa, ang anchorman sa TV Patrol Central Visayas kagahapon sa programa sa Maayong Buntag Kapamilya nagkanayon nga dunay imbestigasyong himuon batok sa grupo ni Ramil Paican.

Kini human giingong wala kini dayon motug-an sa kinatibuk-ang video footage nga maoy ilang gipakita sa una nilang pagbalita kalabot sa insidente diin wala giapil ang video nga ilang gitabangan og kulata si Liddawa hangtud nga nakuyapan.