Motor sa mga tulisan nasakmit sa kapolisan

Usa ka motorsiklo nga maoy gihimong sakyanan sa pagpanulis  nasakmit human sa pipila ka oras nga  paggukod sa mga polis sa dakbayan sa Mandaue sa miaging gabii.

Si PO1 Gilbert dela Cruz sa Presinto 5 sa Opao Police Station nga gikahinabi sa Banat News miingon nga ilang nasakmit ang motorsiklo nga XRM nga itom ug nagdala sa plate number nga GA 38-67.

Gilangkoban nila ni PO2  Dante Wenceslao ug mga kauban sa Presinto 5 nga nagsakay sa Mobile 07 nga nagpatrolya sa maong dapit maoy nakasakmit sa maong sakyanan nga gibiyaan sa mga tulisan sa paghidangat sa Upper Jagobiao.

Matud pa niya nga ang duha ka wala mailhing lalaki nga nagsakay sa maong motorsiklo maoy nagtulis sa duha ka dalagita nga sila si Cristina  Castro ug Cherry Ann Nuñez nga pulos 17 anyos sa San Jose Village, Umapad sa maong dakbayan.

Ang duha ka dalagita nga nakuhaan sa ilang cellphone mao lamang ang ikaduhang biktima sa maong mga tulisan nga nag-motorsiklo sanglit ang laing gitulis mao ang managhigugmaay nga nag-date sa maong dapit alas 10 pasado ang takna sa gabii.

Matud pa ni PO1 dela Cruz nga nasugatan sa duha ka dalagita human sa pagtulis kanila ang Mobile Patrol 07 nga giluwanan nila ni PO2 Wenceslao ug ilang gigukod human mangayo'g panabang kanila ang mga biktima.