Patay ang usa ka lalaki human kini giluba sa iyang kainom sa milabay'ng adlaw duol sa gipahigayong disko sa Barangay Tutay, lungsod saPinamungahan.
Ang biktima giila nga si Placido Bejec, hingkod ang panuigon, residente sa Sitio Santa Cruz, Barangay Sacsac sa maong lungsod.
Si Bejec kinsa nakaangkon og mga samad dinunggaban sa iyang lawas daling gidala diha sa Pinamungahan District Hospital apan gideklarar kini sa doktor nga patay na .
Ang suspetsado giilang si Levy Dejito, 21, nagpuyo usab sa nahisgutang lugar apan daling miikyas.
Sa wala pa mahitabo ang insidente, si Bejec ug Dejito nag-inom mga 50 metros gikan sa gipahigayong disko diha sa ilang lugar apan pila ka gutlo ang milabay nakit-ang patay na si Bejec.
Si Dejito nakit-an sa mga residente nga nagdala og traveling bag pahilayo sa lugar apan wala na kini maabti sa mga polis.