Korean community nagpasalamat

Personal nga gipasalamatan sa presidente sa United Korean Community Association Inc. Cebu ang Cebu City Police Office sa daling pagkasikop ug pagkasulbad sa pagtulis ug pagpusil sa usa nila ka paisano.

Si Charlie Shin, miadto sa buhatan ni Sr.Supt. Patrociñio Comendador kagahapon sa buntag ug mipasalamat kang Comendador ug sa tanang police units nga mitabang sa pagdakop sa mga suspek nga mitulis ug mipusil kang Young Seuk Jeon.

Ang mga suspek nga nadakpan giilang sila si Adrian Lim ug Ramil Pelicano samtang gipasanginlang kunsabo sa duha mao si Jonmie Merino nga nasikop usab human kini maoy mihipos sa armas nga gigamit sa krimen.

Si Young ug higalang si Soon Oh niadtong tungura nanagan palayo kang Pelicano dihang gipangayo niini ang ilang mga bag apan gipusil hinuon sa suspek ang likod ni Young ug milapos ang bala diha sa iyang tiyan.

Luwas na hinuon si Young sa peligro ug ang armas nga giingong gigamit sa pagpamusil narekober na sa kapolisan diha sa posesyon ni Merino diha sa Carreta.

Ang mga suspek nga sila si Ramil Pelicano alyas Bolantoy ug Adrian Lim uban ang usa ka giingong mitago sa armas nga gigamit sa krimen nga si Jonmie Merino gipasakaan na og kaso kagahapon.

Si Shin sa pakighinabi sa mga tigbalita nagkanayon nga "nasurpresa" siya sa kapaspas pagkadakop ug pagsulbad sa kaso. Wala hinuon mibutyag si Shin kung unsay iyang gipasabot sa 'surpresa' apan alang kaniya angayang pasidunggan ang CCPO sa maong trabaho.

Hinuon mibutyag si Shin nga kini maoy labing unang kaso dinhi sa Metro Cebu nga dunay nasulbad nga kasong ang nabiktima mga Koreano.

Si Comendador sa pakighinabi sa mga tigbalita nagkanayon nga mas mapadali pa unta ang pagkasulbad sa kaso kung wala lang malangay ang pagpasa sa impormasyon nga gitug-an sa usa ka testigo diha sa Talamban police station pila ka oras human niya i-report ang nasaksihan.

Si Shin mitug-an sa mga tigbalita nga ilang hatagan og suwat pasidungog ang CCPO sa ilang kalampusan samtang mitug-an kini nga dunay ihatag nga surpresang regalo ngadto sa kapolisan ning mosunod nga mga adlaw.