4 anyos nalumos

Patay na nga nalandig sa tambalanan ang usa ka kwatro-anyos nga batang lalaki kinsa gikatahong nalumos niadtong Biyernes sa hapon diha sa dagat sa Tanke, dakbayan sa Talisay.

Ang biktima giila sa mga polis nga si John Mark Reponte, residente sa maong lugar kinsa naugkat sa ilang silingan nga si Edmer Reyes nga naglutaw na diha sa dagat.

Base sa imbestigasyon ni PO2 Joel Rosales, polis sa Talisay, nga si Edmer hubog kini ug niagi diha sa lugar nga nahitaboan og gibunlot niini si Reponte gikan sa dagat dihang iyang nakit-an nga naglutaw ang biktima.

Daling gidala ni Reyes si Reponte diha sa Talisay District Hospital apan gideklara kini sa doktor nga patay na nga naabot sa tambalanan.

Ang amahan ni Reponte nga si Rogelio nagdumili sa awhag sa mga polis nga ipa-autopsy ang iyang anak aron mahibaw-an kung aduna bay foul play sa nahitabo sa biktima.