Shabu 'mini tsangge' gironda

Gidudahang shabu mini "tsangge" diha sa sitio Zone Sunlot, sa Kalawisan dakbayan sa Lapulapu gironda sa mga sakop sa Criminal Investigation and Detection Group kagahapon sa kaadlawon.

Ang gironda mao ang panimalay ni Joemar Inihao, alyas Osting pinasikad sa search warrant ng giluwatan ni RTC branch 9 judge, Geraldine Faith Econg tungod sa paghupot og iligal nga drogas.

Si Inihao nasikop atol sa maong ronda ug nakuha diha sa iyang panimalay ang usa ka medium size pack sa gituuhang shabu, pito ka paketeng may mga residue sa maong gidudahang iligal nga drogas, ug daghang mga ginamit nga mga aluminum foils ug tissue.

Matud pang Chief Inspector Fermin Armendares III, ang nangulo sa CID-team niadtong tungora nga nagpasad lang ang mga ginamit nga mga foils, pakete ug mga linikit nga tissue paper sa mga gagmay'ng kwarto sa balay ni Inihao.

Dugang pa ni Armendares nga dunay gamay'ng bintana diha sa balay niini nga maoy nagsilbeng 'kahera' diin mobayad ug mapalit ang shabu ug didto kini gamiton sa sulod sa maong panimalay.

Ang maong balay gikatahong dunay usa ka entrance apan tulo ka mga exit apan naplanuhan na kini sa mga operatiba base usab sa nakuhang impormasyon gikan sa mga impormante hinungdan nga wala makaipsot si Inihao.

Sumala pa sa usa sa mga operatiba, base sa gitug-an sa mga opisyales sa barangay nga dunay protektor nga polis si Inihao ug mao kini karon ang gisusi sa CIDG7.