'Kidnap me' nahitabo atol sa Summit

Gikonpirmar ni mayor Tomas Osmeña nga dunay gikidnap sa Sugbu atol sa sa 12th Asean Summit niadtong petsa 12 hangtod sa 15 ning bulana.

Gitug-an sa mayor nga usa ka Pinay nga naka-asawa og French national ug ania manimuyo sa Sugbu ang padayon karong gi-imbistigar sa CIIB sa Cebu City Police Office (CCPO).

Gidugang sa mayor nga kini ang hinungdan nganong wala siya makatambong atol sa pagbukas sa Asean Summit diha sa Cebu International Convention Center (CICC) ug sa uban pang mga kalihukan gumikan kay napunting ang iyang atensyon sa maong kaso.

Hinuon nagdumili pagtug-an si Osmeña sa tinuoray'ng pangalan ug sa bana niining langyaw aron paglikay sa dakong kauwawan ug ilang proteksyon.

Sa inisyal nga impormasiyon sa mayor nipadayag kini og pagduda nga posibling "kidnap me" kon tinuyo ang maong panghitabo sa asawa sa maong French National gumikan kay nasakpan kini nga nagdula pa sa Casino niadtong higayuna ug dunay report nga napildi na kini og dako og wala nay kuwarta nga ikatahan.

Sigun sa maong impormasyon nga kini maoy posibling hinungdan nga nitawag kini ngadto sa iyang bana nga French National aron magpabayad og ransom aron lukaton kini sa iyang bana og aron mabayran niya ang dakong utang nga napildi diha sa Casino.

Gitug-an sab ni Osmeña nga iyaha nang napahibalo ang embahada sa nasud France.

Matud sa mayor nga nakahibalo siya kon pilay ransom nga gipangayo apan nagdumili na siya pagtug-an kung pila.