3 Tawo na-missing kit-an na'ng pulos patay

Napalgang patay ang tulo ka tawo nga na-missing human nangaanod sa baha niadtong Sabado diha sa Sitio Ilaya, Barangay Candulawan, Talisay.

Ang lawas ni Jero Gonzales Tan, 17, taga Sitio Sario, Bulacao niining dakbayan napalgan mga 6:30 sa buntag kagahapon.

Ang mga kauban ni Tan nga si Paul John Lampria 18, taga Sityo Tugas, Pardo niining dakbayan napalgan niadtong Sabado sa mga alas 7:30 sa gabii.

Sunod si Josefino Bacus Jr. 19, taga Cogon, niining dakbayan napalgan usab mga 9:40 niadtong Sabado.

Ang tulo napalgan sa rescue team diha sa sapa sa Whiteroad, Inayawan niining dakbayan.

Ang maong mga biktima nagkabuwag mga 150 metros ang gilay-on ug pulos kini nakaangkon og mga bun-og sa lawas ug ulo.

Ang mga patay'ng lawas sa tulo gidala diha St. Francis Funeral Homes alang sa autopsy.

Apan aduna pay laing duha nga giila sa mga polis nga usa ka "Mike" ug Marvin Tero nga padayon pang gipangita hangtod sa pagsulat ning balita.

Gawas sa namatay ug na-missing, adunay laing duha ang naangol nga sila si Ronnie Verbosado kinsa gidala diha sa Cebu City Medical Center ug Adrian Varquez ang naa sa kritikal nga kahimtang.

Apan kagahapon sukwahi ang pamahayag ni PO2 Erwin Carbonquillo sa Homicide Section sa Talisay kinsa maoy nag-mbistigar sa maong insidente dihang nahinabi kini sa Banat News kagahapon sa buntag.

Si Carbonquillo nagkanayon nga padayon pa nilang gipangita si Tan ug usa ka "Marvin". Wala sila makakuha sa ngalan usa ka namatay tungod kay gikuha dayon sa punerarya ang mga patay'ng lawas.

Ang ngalan lang ni Bacus ug Lompria maoy ilang nakuha.

Si Carbonquillo mikompirma nga 13 kabuok ang nanganod.

Matud ni Carbonquillo nga ang mga biktima gikan sa usa ka internet café ug nagkasabot nga mangaligo sa sapa.

Mikalit pagbundak ang kusog kaayong uwan nga maoy hinungdan sa kusog usab kaayong baha.

Si Kapitan Josefina Conceal sa Candulawan miuban sa rescue team sa pagpangita sa mga biktima.

Usa ka nagpailang barangay konsehal sa lugar mitawag sa kapolisan sa Talisay ug nagpahibalo kabahin sa insidente.

Sa laing bahin, usa ka sakop sa TEAT mibutyag kagahapon sa Banat News nga mga alas 5:00 sa hapon unang miabot ang ilang grupo sa lugar nga nahitaboan og nanawag na sila sa mga polis.

Ang kapolisan sa siyudad miabot sa nahisgutang lugar usa ka oras na ang milabay gikan sa paghiabot sa TEAT.

Gihimakak usab sa sakop sa TEAT nga gidala ang mga patay'ng lawas sa punerarya nga walay mga polis.

Ang TEAT misubay sa bul-og sa tubig paingon sa sapa sa White Road diin aduna silay kuyog nga mga polis sa siyudad.

Apan pag-abot nila sa Whiteroad, ang mga polis sa Talisay mibiya nga wala mananghid posible sa rason nga ang maong lugar sakop na sa dakbayan sa Sugbo.

Si Talisay City Fire Marhall Felipe Canillas nanawag sa control sa Cebu City Fire Department ug mangayo og ayuda nga matawagan ang Homicide Section sa kapolisan sa Cebu City Police Office (CCPO).

Ang team mi-pull-out mga alas 11:00 na sa gabii niadtong Sabado.

Si Bise-Mayor Aberdovey Belleza tsirman sa kahapsay ug kalinaw mibutyag kagahapon sa Banat News nga nanawag usab siya sa Talisay Police Station sa Talisay aron adunay polis nga mokuyog sa rescue team nga nangita sa mga naanod diha sa Whiteroad.

Gihimakak usab ni Belleza nga ang mga patay'ng lawas sa mga biktima gikuha sa punerarya nga wala pay mga polis