2 ka blocktimers gikiha'g P1M libel

Pormal nga gipasakaan og P1milyon nga kasong libelo ni Director Elberto Emphasis sa Philippine Reclamation Authority diha sa City Prosecutors Office kagahapon sa hapon sila si Lito "Bimbong" Solon ug Reynante "Rey" Cortes nga mga blocktimer sa estasyonan sa Bantay Radyo.

Base sa giduso nga reklamo ni Emphasis nga niadtong Septiyembre niining tuiga sa programa nila ni Solon ug Cortes nga "Encuentro" sa nahisgutang estasyonan sa radyo mibuhi og mga malisyosong pulong nga nakahatag og kadaot sa iyang pagkatawo.

Si Cortes, sumala sa complaint ni Emphasis nagkanayon "ikaw Edward Ligas, bata-bata man ka niadtong mangingilad ug matan-aw nato'g klaro gyud nga swindler, kadtong nganlan og Elberto "Bert" Emphasis, hoy! Mangingilad, Bert Emphasis sige gihapon ka do? Kay wa naka kasod sa customs kay wa na imong amo nga si......"

Si Solon usab, matud sa complaint, nagkanayon nga "mao man nang tarantar, paingon sa pagkabuang kay gumikan nga naanad na man gud nig sige og dawat, sige og palusot gikan sa rice smuggling ug tiles."

Si Emphasis mipasangil nga ang gibuhat nila ni Solon ug Cortes usa ka pamaagi sa extortion ngadto kaniya. Gani nasikop sila si Cortes ug Solon sa gipahigayong entrapment operation sa National Bureau of Investigation (NBI) niadtong Septiyembre 29, kinsa ang duha giingong midawat sa P20 mil nga marked money.

Si Miguel Aton miluwat og affidavit pabor ni Emphasis kinsa nagkanayon nga nakadungog siya sa mga libelous statement sa programa nila ni Solon ug Cortes batok ni Emphasis.

Sa laing bahin, si Emphasis mibutyag nga niadtong 2004 miduso siya og reklamo sa Kapisanan ng mga Brodkaster sa Pilipinas batok ni Solon ug Cortes human siya atakeha sa duha sa programa niini.

Gitumbok ni Emphasis nga tungod sa iyang gibuhat nga pagpa-entrap kanila, si Cortes ug Solon nangita og paagi nga makabawos kaniya.

Si Emphasis nanghinaot nga sa insidente karon angayang istriktong pagpatuman ang Radio Code aron dili magsayon-sayon og buhat og kalapasan ang ubang mga brodkaster sama kanila ni Solon ug Cortes.

Si Emphasis midungag nga ang KBP angayan nga mohatag og pakabana sa nahisgutang insidente ug ipa-istrikto og implementar ang Radio Code.