Anti-Sugbuak pirma gisugdan

Gibutyag kagahapon ni Gobernador Gwendolyn Garcia nga nagsugod na ang probinsiya sa pag-apod-apod sa mga porma ngadto sa mga lungsod alang sa signature campaign sa Sugbuak.

Gawas sa mga porma gitataw usab ni Garcia nga adunay mga tarpaulin nga gihimo ang probinsiya alang sa nahisgutang kampaniya nga ipangbitay diha sa mga munisipalidad.

Matud sa gobernador nga nagkinahanglan og 2 milyones ka pirma aron dili mapatuman ang pagbuak-buak sa lalawigan sa Sugbo ug diha sa kapitolyo pagahimoon ang pag-ihap sa mga pirma.

Kahinumduman nga si Kongresista Simeon Kintanar sa ikaduhang distrito, Antonio Yapha sa ikatulong distrito ug Clavel Martinez sa ika-upat nga distrito ang mipasar og balaodnon sa tinguhang pagbahinbahin sa Sugbo.

Ang nahisgutang balaodnon nga magbuak sa Sugbo napasar na sa House committee on local government.

Apan si Kongresista Eduardo Gullas sa unang distrito, Raul del Mar ug Antonio Cuenco sa amihanan ug habagatang distrito ug ubang dili Sugboanon nga kongresista miduso og motion for reconsideration sa maong committee.

Si Garcia mibutyag usab nga ang kagamhanan sa probinsiya nag-conceptualize og mga TV ads kabahin sa pagsupak sa Sugbuak.

Ang gobernador midungag nga klaro kaayo nga supak ang mga Sugboanon nga buak-buakon ang lalawigan sa Sugbo apan wala kini paminawa sa uban nga mga opisyal sa kagamhanan ilabi na ang mga nagpaluyo sa nahisgutang balaodnon.