Plantasyon sa MJ gironda sa kapolisan

Laing plantasyon sa marijuana nadiskubrihan sa kapolisan sa Danao sa usa ka luna nga giabandonar sa Sitio Lantawan, Cahumayhumayan bukirang bahin sa dakbayan sa Danao.

Segun sa report, ang kapolisan gipangulohan ni Supt. Larson Dechino inabagan sa iyang mga sakop mihimo og pagpangronda human sila makadawat og taho pasado alas 9 sa buntag sa miaging adlaw nga adunay mga punoan sa marijuana sa nahisgutang lugar.

Daling mituyo og adto ang mga polis ug ilang nakit-an ang mga punoan sa marijuana nga gitanom diha sa kalibunan.

Mokabat sa 45 ka punoan sa marijuana ang ilang naibot nga matud pa hapit na kini anihon sa nagtanom.

Si SPO1 Jose Relampagos sa Danao miingon nga wala silay nadakpan nga caretaker atol sa pagpangibot sa punoan sa marijuana.

Hinuon matud ni SPO1 Relampagos nga padayon pa nilang gipapanid-an ang tig suplay niining mga punoan sa marijuana.