Natulog giliog pagpusil

Gidala sa Vicente Sotto Memorial Medical Center (VSMMC) ang usa ka tawo nga naangol kinsa biktima sa pagpamusil sa miaging gabii sa barangay Angilan sa lungsod sa Aloguinsan.

Ang biktima mao si Gaudencio dela Serna Manguilimutan, 48 anyos, minyo, nga nagpuyo sa maong dapit.

Si PO2 Roger Uriate sa kapolisan sa nahisgotang lungsod miasoy sa Banat News nga natulog na ang tibuok pamilya sa biktima dihang namatikdan niining may mihagsa nga mga bato sa atop sa ilang balay.

Matud pa ni PO2 Uriate nga mibangon ang biktima ug milili sa bintana hangtod nga nabati ang lanog nga boto sa armas, ug nakamatikod sa pagbuswak sa iyang liog.