Bag-ong CP number sa CCPO pwede sumbongan

Duna nay opisyal nga cellphone number nga mapadad-an og reklamo ug mga impormasyon kabahin sa krimen ang publiko diha sa buhatan ni Cebu City Police director Supt. Melvin Gayotin.

Si Gayotin mipahibalo nga mahimo nang mo-text ang publiko sa cellphone number nga 0921-4931616 kung duna silay mga reklamo kabahin sa mga binuang sa mga polis, mga krimeng nahitabo ug ubang mga importanteng impormasyon.

Ang maong cellphone i-operate sa operations section 24 oras aron mahatagan og aksyon ang mga reklamo sa publiko sa daling panahon ug aron matubag ang mga alarma kun walay teleponong magamit pagtawag sa hotline 166.

Subay kini sa direktibang gipagawas ni Police Regional Office 7 direktor, Chief Supt. Silverio Alarcio nga kinahanglang matag police station sa iyang hurisdiksyon dunay cellphone diin madangpan sa mga reklamo.

Sa maong direktiba, gimandong ipabutang ang maong mga numero sa cellphone hotlines diha sa mga pampublikong dapit sa matag lugar aron madali ang pagtimaan sa mga tawo.

Sukad nga naabot ang direktiba ni Gayotin ngadto sa tanang police stations sa dakbayan sa Sugbo, ang Carbon police station pa lamang ang nakasanong niini.

Ang Carbon police station dunay cellphone hotline nga 0906-7271389 nga kanunay'ng gibantayan sa kasamtangang duty desk officer sa maong buhatan sulod sa 24 oras.

Apan si Gayotin sa iyang bahin nagkanayon nga iyang hatagan og suhestiyon ang PRO7 nga usa nalang ka cellphone ang angayang gamiton nga diha ra gyud ibutang sa operations gumikan sa nakitang mga problema nga posibleng motumaw susama sa hurisdiksyon ug sa pagpasa-pasa unya sa mga reklamo.