2 tau gibirahan sa Akhro

Duha ka mga sakop sa Tau Gamma Phi fraternity ang nangalandig sa managlahing tambalanan human gipusil ug gidunggab sa mga gidudahang mga sakop usab sa karibal nga grupong Alpha Kappa Rho fraternity sa managlahing insidente niadtong Sabado sa gabii sa dakbayan sa Mandaue ug Sugbu.

Dinhi sa Sugbu, napusilan ang miyembro sa Tau Gamma Phi nga si Jasper Sumilhig, 22, residente sa dalan V. Rama, Calamba ning dakbayan sa giingong miyembro usab sa ribal nga grupo nga naila lang sa ngalang "Bobby" nga taga Sitio Alinsunurin sa samang barangay.

Sumala pa sa imbestigasyon ni SPO3 Zenaido Pastorfide, ang biktima kasamtangang nakig-inom sa iyang mga higala sa usa ka tindahan diha sa eskina sa V. Rama ug Private road dihang miabot gikan sa likod ang suspek.

Walay igong rason, kalit nga gipamusil sa suspek ang ilang grupo hinungdan sa ilang pagkatibulaag apan ning tungura naigo sa walang bahin sa sampot si Sumilhig.

Human sa pagpamusil mikaratel og dagan ang suspek samtang gidali og dala sa mga kauban si Sumilhig sa Cebu City Medical Center.

Samtang sa dakbayan sa Mandaue, laing miyembro usab sa Tau Gamma Phi fraternity ang naangol human gitabangan og dunggab sa duha ka mga sakop sa Akrho diin usa kanila menor de edad.

Nakaangkon og samad dinunggaban ang biktimang si Ryan Rontal, 18, residente sa Opao sa nahisgutang dakbayan atol sa usa ka kalingawan sa ilang barangay.

Wala makaipsot sa mirespondeng sila si PO2 Renato Alondares ug PO2 Cerilo Muñoz ang mga suspek nga sila si Gerilo Gabuya,19, ug ang 16 anyos niyang kauban nga si Kenneth John (apelyedo gipugngan), mga residente sa barangay Looc sa samang dakbayan.

Si PO2 Vicente Gila sa pakighinabi sa Banat News mikumpirmar nga mga miyembro sa nahisgutang mga fraternity ang biktima ug mga suspek. Dugang pa ni Gila nga nangangkon ang usa sa mga suspek nga kaniadto siya maoy gipareglahan sa grupo sa biktima ug ang nahitabo bawos-bawos lang.

Samtang si Alondares sa samang pakighinabi mitug-an nga pareglahay ang pamaagi sa duha ka grupo susama sa nahitabo niadtong tungura.

Daling gidala sa Vicente Sotto Memorial Medical Center ang biktima.