Sikyu gipapriso sa polis kay nanguha'g cellphone

Natingkagol sa prisohan niadtong Sabado sa buntag ang usa ka security guard human gipasanginlang mikuha og cellphone sa polis. Ang maong insidente nahitabo niadtong petsa 30 sa Enero niining tuiga diha sa Hyper Power Service Center, Barangay Linao dakbayan sa Talisay.

Ang biktimang si PO2 Noel Villamor kinsa nadestino diha sa Provincial Security Service Group sa Provincial Police Office ang misikop ni Jefferson Gonato.

Si Gonato gitugyan ni Villamor sa kapolisan sa Talisay.

Base sa imbestigasyon sa kapolisan sa Talisay nga nakita ni Villamor si Gonato nga naggamit sa iyang 8310 Nokia cellphone nga nagkantidad og P12,000.

Si Villamor mibutyag sa kapolisan sa Talisay nga niadtong Enero 30 mianha siya sa nahisgutang lugar ug ang iyang cellphone nabiyaan niya sulod sa iyang sakyanan, apan pagbalik niya wala na ang maong butang ug nakita na lang niya kini niadtong Sabado nga gigamit na ni Gonato.

Base sa talaan sa kapolisan sa Talisay si Gonato miangkon nga siya maoy nagkuha sa cellphone atubangan sa tag-iya sa service center.

Apan milimod kini nga siya maoy nagkuha dihang gipangutana kini kagahapon sa hapon ni PO3 Harrisson Quiñanola jailer sa sub-station diha sa Lawaan diin si Gonato nadetiner.