Akrho kritikal human gipusil

Usa ka sakop sa Alpha Kappa Rho ang kritikal nga milandig sa tambalanan human kini pusila makadaghang higayon sa usa ka lalaki diha sa Sitio Panaghiusa barangay Duljo-Fatima ning dakbayan niadtong milabay'ng Lunes sa hapon.

Ang biktima giilang si Nonito Diacamos, 23, ulitawo molupyo sa maong lugar ug sakop sa Akrho kinsa milandig sa Cebu City Medical Center gumikan sa igo diha sa tuong kilid, tiyan ug tuong bukton.

Gitumbok nga mipusil sa biktima mao si Emiterio Alquizar alyas Junjun, taga Sitio Mansanitas kinsa gituohang dugay nang gikaaway sa biktima.

Base sa imbestigasyon nila ni SPO3 Alex Dacua, PO3 Rogelio Nedamo ug PO3 Henry Orbiso ang biktima kasamtangang nagpahuway kauban sa iyang ka -brod nga si Andy Abatilla dihang kalit nga miabot ang suspek dayon walay daghang pangutana gipusil makadaghang higayon si Diacamos.

Human sa hitabo daling miikyas ang suspek samtang gitabang sa mga kauban pangadto sa tambalanan ang biktima. Gisubay karon sa kapolisan ang hinungdan sa pagpamusil.