Duha ka lalaki nalumos sa Casaroro Falls

DUMAGUETE CIT , Philippines – Duha ka mga lokal nga turista ang nangalumos sa nabantog nang  Casaroro Falls sa lungsod sa Valencia sa Negros Oriental niadtong Huwebes atol sa adlaw sa mga Santos.

Nunot niini si Mayor Enrique Gonzalez, Jr. sa lungsod sa Valencia naglaraw nga mabutangan na og lifeguard ang maong falls tungod kay kini usa na ka tourist attraction.

Sa pasiunang report giila ang mga nangalumos mao sila si Darryl Lim, 22, nga taga Cavite City, ug Anthony Patacsil, 20, nga taga Baguio City,nga parehong adunay kaubang mga babaye nga mibisita sa maong lugar dihang nahitabo ang trahedya sayo sa buntag nianang adlawa.

Sumala pa nga nagsalom-salom ang grupo dihang usa sa mga lalaki ang mitidlom ug wala na molutaw pa, tungod niini daling misawom ang ikaduhang biktima aron kini pangitaon apan ang duha wala na molutaw pagbalik.

Ang mga patay’ng lawas naugkat sa mga rescuers diha na sa kinailadman sa maong falls pipila ka oras gikan sa pagkatidlom sa duha.

Sumala pa sa mayor nga ang Valencia Police, rescue team sa lungsod ug mga scuba divers ang nagtinabangay pagpangita sa duha.

Nasuta nga ang duha parehong nagtrabaho sa Dumaguete Cathedral Credit Cooperative (DCCCO) sa Dumaguete City matud pang Gonzalez.

Midugang si Mayor Gonzalez nga gawas sa lifeguard, tun-an usab nila ang uban pang mga posibleng pahimangno nga ilang ihatag ngadto sa mga turista alang sa ilang luwas nga pagbisita sa maong falls nga usa sa labing nindot nga suroyan sa maong lalawigan.

Ang Casaroro Falls may gihabugong gibanabanang 100 ka tiil nga ang tubig adto matagak sa usa ka susama og planggana nga maoy balikbalikon sa mga turista. (/EIM) (BANAT NEWS)