Morales tinawag na ‘STL’ ng ex-PDEA chief

MANILA, Philippines — Tinawag na isang professional “STL” o story telling liar ni dating Philippine Drug Enforcement Agency (PDEA) chief Dionisio Santiago si dating PDEA agent Jonathan Morales sa pagpapatuloy ng pagdinig ng Senate committee on public order and dangerous drugs kaugnay sa sinasabing nag-leaked na confidential document ng ahensiya.

Nagsilbing surprise witness ni Senator Jinggoy Estrada si Santiago na nagsabing kilala umano si Morales sa pagiging sinungaling kaya STL ang tawag sa kanya.

Una rito, nilinaw ni Estrada na dinala niya sa pagdinig si Santiago upang kumpirmahin ang mga nauna niyang pahayag laban kay Morales.

Bagaman at hindi kasama si Santiago sa mga inimbitahan ng komite, pinayagan ni Sen. Ronald “Bato” Dela Rosa, chairman ng komite na magsalita ito sa pagdinig.

Sinabi ni Santiago na nagtataka siya kung  bakit kung saan-saan nakakapunta si Morales at nakaderetso ito hanggang Malacanang at wala itong sinusunod na “chain of command.”

Binatikos aniya ni Morales hindi lamang ang kanyang liderato maging ang mga sumunod na lider ng PDEA kung saan pinalalabas na siya lamang ang tama at may problema ang mga namumuno sa PDEA.

Samantala, sinabi ni PDEA acting director  legal and prosecution service Atty. Francis del Valle na hindi official document ng PDEA ang sinasabing nag-leak na dokumento at kumalat sa social media.

Ayon kay Valle, walang control  number ang naturang dokumento patunay na hindi ito opisyal na dokumento ng kanilang tanggapan.

Matatandaan na si Morales ay permanenteng pinagbawalan sa government service base sa desisyon ng Civil Service Commission (CSC) noong Hulyo 7, 2014.

Samantala, umapela si Senate President Juan Miguel “Migz” F. Zubiri na panatilihin ang integridad ng Senado matapos hindi makapag-prisinta ng mga konkretong ebidensiya laban sa mga personalidad na iniuugnay sa paggamit ng ilegal na droga.

“I caution our colleagues to be very careful not to use hearings in aid of political persecution…What we are protecting here is the institution – the Senate,” ani Zubiri.