Inakusahang holdaper at rapist, nilikida
LEGAZPI CITY, Albay, Philippines - Bulagta ang 38-anyos na magsasaka na inakusahang holdaper at rapist matapos itong igapos at ratratin ng mga rebeldeng New People’s Army (NPA) sa Purok Centro, Barangay Cagay sa Masbate City, Masbate kamakalawa ng hapon. Sa police report na nakarating sa Camp Simeon Ola, pauwi na ang biktimang si Michael Cañares mula sa pagpupulong kaangkas ang kanyang misis na si Gemma sa motorsiklo nang harangin ng ilang kalalakihan na sinasabing NPA rebs. Pinaalis ng mga rebelde ang asawang si Gemma at ilang residente kung saan tinalian sa kamay ang biktima saka pinagbabaril. Narekober sa crime scene ang mga basyo ng bala. Sinabi ng asawa ng biktima na inakusahan ito ng mga rebelde na nasa likod ng mga kaso ng holdapan at panggagahasa sa nasabing lugar.
- Latest