Pagpamadlong sa EU
Gibalikas na sang Presidente Rodrigo Duterte ang European Union tungod sa iyang giisip nga pagpanghilabot sa EU sa iyang gubat sa drugas. Usa sa labing gikasuk-an ni Duterte mao ang resolusyon sa European Parliament nga nag-awhag sa paghunong sa laktod nga pagpamatay sa gidudahang mga durugista.
Napasar ang resolusyon human gipahibawo sa EU ang mga embahador sa Pilipinas nga gisubli ang mga pribilehiyo sa libre o linaslasan nga buhis sa mga produkto sa Pilipinas nga gipasud sa Uropa, ang usa sa labing dakong merkado sa kalibotan.
* * *
Gitumbok sa European Parliament ang mosunod nga mga sukaranan sa ilang resolusyon: Dugay nang relasyon sa Pilipinas ug EU; pagpapas sa silot sa kamatayon sa Pilipinas niadtong 2006; pagpamomba sa Davao niadtong Septiyembre 2016; pagdeklarar ni Duterte og "state of lawlessness;" pagdaog ni Duterte sa plataporma batok sa drugas, terorismo ug pangurakot; kinatas-an ang Pilipinas sa paggamit sa shabu sa silangang Asya niadtong 2012, nag-drugas ang 12% sa populasyon, drug cartels sa China ang nahilambi-git ug nibalor og $8.5 bilyones ang negosyo sa drugas sa Pilipinas; pagpasidaan ni Duterte pagpatay sa ka-liboan ka durugista; pagsaad ni Duterte pagbanhaw sa silot sa kamatayon; pagpamatay sa mga polis ug vigilantes sa suspitsadong mga durugista; pagsibya sa listahan sa gidudahang mga durugista; pagkondenar ni UN Secretary General Ban Ki-moon sa extrajudicial killings ug pag-insistir ni Duterte nga angay’ng patyon ang badlungong mga sakop sa media; pag-insulto ni Duterte nilang Ban Ki-Moon, Pope Francis ug US President Barack Obama; pagpirma sa Pilipinas sa Universal Declaration of Human Rights; ug pagdason sa Pilipinas sa International Covenant on Civil and Political Rights, nga nagtahud sa batakang mga kagawasan, apil nang kagawasan gikan sa bangis ug di tawhanon nga silot.
* * *
Pinasikad sa ibabaw, ang European Parliament: Nikondenar sa pagpangatake sa mga terorista sa Davao; niawhag sa Pilipinas paghunong sa extrajudicial killings; niawhag sa Pili-pinas pagpatigbabaw sa kamakiangayon sa sistema sa hustisya ug pagpalig-on sa kapolisan; niawhag sa gobyerno pagbadlong sa vigilantes, pagsilot sa mga responsable sa laktod nga pagpamatay ug pagpapas sa silot sa kamatayon; nidasig ni Duterte pakigsulti sa ubang kanasuran ug kalibotanong kahugpongan; ug niawhag sa EU pagduso sa mga rekomendasyon ngadto sa gobyerno sa Pilipinas.
- Latest