Banat Showbiz

Jade keeps dreaming

March 6, 2017 | 12:00am

CEBU, Philippines - Matud pa ni Jade nga buhaton gyud niya ang tanan aron lang molambo ang dagan sa kinabuhi sa iyang pamilya gumikan kay dili lalim ang nakita niya nga lisud gyud ang kinabuhi kun ang panimalay anaa nahimutang sa bukirang bahin nga layo sa sibilisasyon.

Giugkat sa Banat News Hugyaw ang istorya sa iyang kinahuhi, diin gisaysay niya nga kaniadtong Grade 4 pa lang siya, ang iyang magtutudlo nga si Angelica Cantiga maoy unang nakadiskobre sa iyang talento. Mao usab kini ang nagtukmod kaniya nga moapil og mga kompetisyon sa pagkanta. Sa pagtungtong niya sa Grade 6, ang iyang magtutudlo nga si Roger Briones maoy nipadayon sa pagpahanas sa iyang talento.

Sukad niadto,gigamit na niya ang iyang katakus pinaagi sa pag-apil og mga amateur singing contest aron makatigum og ginagmay nga kantidad ug aron usab nga makasuporta sa iyang pagtungha ug sa mga gastuhan sa iyang pamilya. Nagtrabaho usab siya kaniadto isip usa ka bagger sa usa ka shopping mall dinhi sa Sugbo.

Ang labing lisud nga nasinati ni Jade mao ang pagka-paralyze sa iyang inahan ug tumang kaguol ang iyang gibati tungod kay dili siya makapokus sa iyang trabaho kay kanunay siya nga mabalaka sa kahimtang niini.

Dili usab mahimutang ang iyang huna-huna tungod kay maglibog siya og asa siya makapangita og pamiliti paingon sa iyang tunghaan sa Naga kun diin didto siya mi-gradwar sa sekondarya.

Gipadayag ni Jade nga ang tanan niya nga nasinati, pagsulay lang kini nga gihatag sa Ginoo ngadto kaniya aron mas molig-on siya sa pagpakabuhi niining kalibutana.

Karong tuiga sa Sinulog Idol, si Jade ang ikaupat nga Talisaynon nga maoy pasok isip finalist. Sangko sa langit ang kalipay nga iyang gibati sa dihang nadungog gyud ni Señor Santo Niño ang iyang pag-ampo nga makasalmot sa maong labing prestihiyoso nga kompetisyon dinhi sa Cebu.

"Grabi akong feelings jud, lipay kaayo ko nga nadala nako sa finalist. Three times ko ni-audition, karon nadala na jud ko", suma pa niya.

Gusto niya nga mokompyansa sa iyang kaugalingon nga talento nga aduna gyud siya'y ikabuga. Dugang pa niya nga gusto usab niya nga mamahimong ehemplo sa katawhan nga kinahanglan "full package" gyud ang usa ka singer , dili lang sa pakanta apan lakip na ang batasan.

Gibutyag niya nga dako og natabang ang maong kompetisyon sa iyang kinabuhi sanglit usa kini sa iyang matawag nga "best thing ever happened to me".

Iyaha gyud nga i-apply ang mga pagtulun-an ug ang mga bag-ong estilo sa pagpasundayag nga iyang nakat-unan sa Sinulog Idol.

QandA

BNH: Kinsa si Jade kung wala sa entablado?

JADE:Makasulti ko sa sa akong self nga ako ang type sa guy nga jamming ikakuyog maong daghan ko'g friends

BNH: Unsa ang di nimo malimtan sa imong unang pagkat-on sa pagkanta?

JADE: Ang dili nako makalimtan, ang kato nga time nga niapil ko og barangay singing contest ,unya tungod sa kakulba nakalimot ko sa lyrics ug wala ko nakakanta og tarung sa song. Uwaw kaayo kay ang mga tao nikanta og apil para makahinumdom ko.

BNH: Unsa ang proudest moment sa imong kinabuhi?

JADE: Ang proudest nga moment nako kay katong nagsunod akong competition nga nadaug ko sa Time Square ug sa PAGCOR. Nadawat ko isip finalist sa Sinulog Idol. Nagpasalamat kaayo ko sa blessings nga nadawat nako ato nga time ug happy kaayo ko nga dili nako siya malimtan sa tibuok nakong kinabuhi.

BNH: Unsa ang kalidad nga imong gipangita sa usa ka singer?

JADE: Ang nindot gyud kay ang makuha ang atensyon sa audience nga maka-connect dayon ug labi na makakuha sa high notes ug kamao modala sa pag-balibali sa tuno.

BNH: Kinsa ang imong inspirasyon?

JADE: Ang akong mga ginikanan. Sila ang number one nako nga inspirasyon para matuman nako ang gusto nako sa akong kinabuhi.

BNH: Unsa nga kompetisyon ang gusto nimo nga maapilan puhon?

JADE: If mahatagan ko og chance , gusto ko mo apil og The Voice sa USA kay para makita nila nga ang Pinoy o Cebuano dili magpapildi basta kanta na ang hisgutan.

BNH: Unsa ang imong nakat-unan pag-apil nimo og mga singing contest?

JADE: Ang nakut-onan nako sa pag-apil og mga singing contest, dapat jud ka nga palaban og dili padala sa kulba. Think positive lang and just do your best and God will do the rest. I-feel ra ang moment. Before you perform dapat mag- pray daan ni God.

BNH: Unsa ang imong plano sa kinabuhi ?

JADE: Ang plano nako para sa future is molarga ko abroad. Adto ko motrabaho, then magtigum ko ug para makatabang ko sa akong mama ug papa ug para sa akong future family someday.

BNH: Kumusta na man ka pagkahuman sa Sinulog Idol?

JADE: After Sinulog idol, dili nako mahadlok nga moatubang sa mga dagko nga competition . Dako kaayo og natabang para nako ang Sinulog Idol ug karon nana koy bag-o nga banda isip usa ka vocalist.

BNH: Unsa ang usa sa imong memorable experience sa pag-apil sa Sinulog Idol?

JADE: Ang memorable experience sa Sinulog Idol is katong pag-grand finals nga bisan wala ko nadala sa top 6, feel nako nga winner nako kay nadala gihapon ko isip finalist kay nakita nako ang mga coaches ug mga alumni nga idols nga naa ra gihapon sila ug pinangga kaayo mi nila. Mura mi nag-reunion ato nga time sa stage. Mao to ang time nga nakulit na sa akong hunahuna ug dili jud nako makalimtan. Salamat kaayo sa tanan.

Fast Facts:

Name: Jade Anthony Alia

Nickname: Jade

Birthday: March 25,1991

Address: Campo 4, Talisay City, Cebu

Hobbies: Duwa og basketball ug singing

Favorite Delicacies : Biko ug Bud-bud

Height: 5'4"

Weight: 50 kgs

Favorite Movie: Titanic

Favorite Color: Black

Favorite Song: The Prayer