Di andam ug di takos

Mahimong nawad-an na og pagsalig si Cebu Governor Junjun Davide sa warden sa Cebu Provincial Detention and Rehabilitation Center (CPDRC) nga si Dr. Gil Macato niadto pang Enero. Kanus-a iyang gisugo si Bobby Legazpi, ang pangu sa Civil Security Unit, sa pagsusi sa nadawat niyang kasayuran nga naghitak gihapon ang mga kontrabando sa prisohan.

Gimando ni Davide ang operasyon bisan sa pasalig ni Macato nga nilambo nang seguridad sa CPDRC tungod sa kausaban nga iyang gipatuman. Di si Macato kon dili si Legazpi ang iyang gitahasan pagduma sa operasyon.

* * *

Si Legazpi na ang nakiglambigit ni Direktor Yogi Ruiz sa Philippine Drug Enforcement Agency sa Central Visayas nga maoy nagsilbi nga kinatibuk-an nga tagduma sa operasyon. Matod ni Ruiz naabtan siya og kapin sa buwan sa pag-umol sa plano.

Si Davide apurado sa paglusad sa ronda. Apan nihangyo si Ruiz og dugang lugway kay kinahanglan pang andamon ang dugang puwersa pagseguro sa kalamposan. Bisan sa tabang sa 200 ka polis ug sundawo kinahanglan pa nilang huboan ug palinyahon ang kapin sa 3,000 ka lalaking binilanggo aron paglikay sa kahigayonan sa duguong riot.

* * *

Nakumbinser si Ruiz nga di paigo ang seguridad sa CPDRC mao ang kapakyas sa jail guards paghatag nila sa mga yawe sa mga selda. Sa pagsugod na nila og guba sa mga kandado, diha pa nangita ang mga guwardiya sa mga yawe gikan sa mga piniriso.

Labihang kuganga sa tanang nilusad sa ronda dihang usa ka piniriso nitumaw gikan sa sud sa selda ug nitunol nila sa dakong pungpong sa mga yawe. Laing timaan sa pagpabaya: Klarong gituyo pagguba ang mga suga aron mag-ngiob ang dakong bahin sa prisohan.

* * *

Di ikahibung nga wa pahibaw-a si Macato sa wa pang ronda. Ang makapahibung mao nga dihang gitawgan siyang Ruiz samtang nagpadayong ronda, wa siya motubag. Ug dihang si Gobernador Davide nay nanawag niya human sa ronda, wa gihapon tubaga.

Atubangan sa mga pasangil nga apil si Macato sa mga binuang sa CPDRC, may nihulagway niya nga di andam ug labaw nang di takos. Kay igo lang nangaplay pagka medical officer sa Kapitolyo atol nga nabakante ang liderato sa CPDRC sa niaging tuig.