Daghang na-late tungod sa baha kagahapon

CEBU, Philippines - Gipasabot sa PAGASA Mactan nga ang nasinating pag-uwan sa Metro Cebu kagahapon, resulta sa panagtagbo sa bugnaw ug init nga hangin.

Ang maong pag-uwan nga nagsugod sa alas 4 sa kadlawon, nakamugna og mga pagbaha sa kadalanan sa Dakbayan sa Sugbo, Mandaue ug Lapu-Lapu nga maoy hinungdan sa  paghuot sa mga sakyanan ug daghang kawani ang nalangay pagsulod sa ilang trabaho.

Nunot niini, nangandam ang kagamhanan sa Siyudad sa Sugbo paglikay nga aduna’y madisgrasya, maangol ug ma-stranded nga mga pasahero.

Si Konsehal Dave Tumulak miingon nga sa pagbunok sa kusog nga uwan kagahapon, gibahaan ang kadalanan sa M.J Cuenco, Sanciangko, Tagunol, Sabellano ug ubang low-lying areas. Gani halos tibuok siyudad, nakasinati og pagbaha ug nakita niini nga ang mga basura  nanggawas sa kanal.

Gumikan niini, iyang giawhag ang katawhan nga mahimong responsable sa paglabay sa basura dungan sa pag-ingon nga dugay na ang maong problema apan ang katawhan wala gihapo’y disiplina. Nanghinaot usab siya nga madali ang pagtrabaho sa mga drainage system sa siyudad.

Ug aron malikayan nga adunay ma-stranded ug ma-late nga mga trabahante, dili mominus sa 15 ka Kaohsiung buses ang giandam nila kun aduna na say masinati nga pag-uwan aron sila pasakyon.

Sa Mandaue, gibahaan ang dalan A.C Cortes diin ang mga sakyanan nga miagi sa Mandaue-Mactan Bridge ug Marcelo Fernan Bridge ang nakasinati og kalangan diin nag-aginod ang mga PUVs. Gibahaan sab ang dalan M.C Briones.

Si Felix Suico ang City Disaster Risk Reduction and Management Council Officer miingon nga bisan sa nasinati nga pagbaha sa Mandaue wala hinuon kini makamugna og pagdahili sa yuta.

Sa Lapu-Lapu, gibahaan ang kadalanan sa Brgy. Basak diin daghang traysikol nga puno sa pasahero ang napagngan og makina nga maoy hinungdan nga pipila ka pasahero ang napugos sa pagkanaug ug mitugsaw sa tubig-baha. Romeo T. Limpangog ug Decemay P. Padilla (BANAT NEWS)