Buwanang kontribusyon sa SSS, tataas

MANILA, Philippines - Posibleng ipatupad ang  pagtaas ng  halaga ng monthly contributions ng mga miembro ng Social Security System (SSS) sa buong bansa .

Ito ay ginawang paglilinaw ni SSS President at Chief Executive Officer Emmanuel Dooc bilang reaksyon sa sinabi  ni Bayan Muna Chairman Neri Colmenares na wala dapat itaas sa buwanang kontribusyon ng mga miyembro makaraan ang gagawing pension hike sa Marso.

“Hindi kami kailanman nagbigay ng anumang pahayag na wala nang mangyayaring pagtaas ng kontribusyon sa SSS. Sa katunayan, ang pagtaas sa kontribusyon ay bahagi ng patuloy na pagreporma sa SSS at aprubado ito ni Pangulong Rodrigo Duterte sa unang bahagi ng taon”, sabi ni Dooc. 

Nabatid na kasabay ng pag-apruba ng karagdagang benepisyo noong ika 10 ng Enero 2017, inaprubahan din ni Pangulong Duterte ang pagtaas ng buwanang kontribusyon upang mapalaki ang Investment Reserve Fund ng pensyon.