Medalya sa talagsaong kaisog
Bisan sa pagtumaw sa lab-as nga mga protesta, lisud na nga bakwion ang pakyaw nga paghatag sa Medal of Valor, ang labing taas nga pasidungog nga ikahatag sa kasundalohan ug kapolisan, ngadto sa 42 ka sakop sa Special Action Force (SAF) nga nangamatay sa engkuwentro sa Mamasapano, Maguindanao duha ka tuig ang nilabay.
Bisan kun apil sa nisupak ang usa sa labing sinaligan ni Duterte sa iyang gabinete nga si Defense Secretary Delfin Lorenzana, mahinayon na ang pasidungog kay si Duterte mismo ang nagrekomendar, busa gidasonan dayon sa National Police Commission (Napolcom) ug iya na sab nga naaprobahan.
* * *
Gawas sa kabalaka nga mabarato ang Medal of Valor, laing sukaranan sa pagsupak mao ang pagkalasaw sa mas dakong sakripisyo sa duha ka sakop sa SAF nga unang gihatagan sa Medal of Valor sa pamunoan ni kanhi Presidente Noynoy Aquino—sila si Senior Inspector Gednat Tabdi nga taga La Trinidad, Benguet ug Police Officer 2 Romeo Cempron sa Danao, Bohol.
Gitataw sa Napolcom sa niaging tuig ang mas taas nga pasidungog nila ni Tabdi ug Cempron wa mopagamay sa sakripisyo sa 42 nila ka kaubanang nangamatay. Hinunoa, gipasikad sa mga testimoniya sa nangabuhi nilang kaubanan sa talagsaon nilang kaisog, katakus ug sakripisyo.
* * *
Si Tabdi maoy pangulo sa nag-unang 84th Special Action Company (SAC) samtang si Cempron maoy main gunner sa nagsunod nga 55th SAC. Bisan samaran ug nagkadugo na, gigiyahan gihapon ang iyang mga sakop pakigpinusilay sa mas daghang armado nilang mga kaatbang.
Samtang si Cempron kuyog sa 36 ka SAF commandos, bisan nabantang ug nalibotan sa armadong mga grupo sa kamaisan sa Sitio Tukanalipao sa Mamasapano, maisugong nakigsangka sud sa lima ka oras aron pagpaikyas sa iyang kaubanan hangtod nga nahutdan og bala.
* * *
Laing nisupak sa pakyaw nga pasidungog sa SAF, si Heneral Ariel Querubin, nahibawo sa iyang gipanulti. Nahatagan siya og Medal of Valor tungod sa pagpangulo sa Marine battalion nga nakig-away sa 300 sakop sa MILF sa Kauswagan, Lanao del Norte niadtong 2000.
Napilde nilang mas dakong puwersa tungod sa pagdasig sa iyang mga sakop paglusad og maisugong mga maniobra, sinalikway ang personal niyang kaluwas, nga nisangpot sa pagtultol sa nahimutangan sa labing gamhanang mga armas sa mga rebelde.
- Latest
