Dylan, Beatles ug Stones

Dili daghan ang nahibawo sa sugyot ni Bob Dylan, nga bag-o lang gikoronahan sa talagsaong pasidungog sa Nobel for Literature, sa paghimo og album, dili lang usa o duha ka kanta, kun dili, tibuok gyud nga album, uban sa Beatles ug Rolling Stones. Giluwatan ni Dylan ang sugyot niadtong 1969 dihang siya ug ang duha ka banda maoy giisip nga mga higante sa musika sa dekada 60.

Sila si George Harrison, Ringo Starr ug Keith Richards nihangop dayon sa sugyot. Samtang wa mobalibad, wa mopakita og interes si John Lennon. Apan hingpit nga nisalikway sa kahigayonan silang Paul McCartney ug Mick Jagger.

* * *

Ang tinubdan ning kasayuran mao si Glyn Johns nga sulod sa 50 anyos maoy producer ug engineer sa bantogang albums: Beatles (Let It Be ug Abbey Road), Rolling Stones (Beggars Banquet, Sticky Fingers ug Let It Bleed), Who (Who’s Next, Quadrophenia ug The Who By Numbers), Band (Stage Fright), Eagles (Desperado ug On the Border), Neil Young (Harvest) ug Clash (Combat Rock).

Matud ni Johns nga giawhag siya ni Dylan pagpahibawo sa Beatles ug Stones sa sugyot sa ilang panag-abot sa airport sa New York uban sa nagsugod sa Rolling Stone Magazine nga si Jann Wenner, nga bag-o lang nakahuman sa makasaysayanon niyang interview ni Dylan.

Apan nahikawan ang kalibotan sa talagsaon unta nga kalidad sa album nga motigom sa mga awit nilang Dylan, Lennon, McCartney, Jagger ug Harrison.

* * *

Nagkatagbo sa labing unang higayon sila si Dylan ug ang Beatles niadtong Agosto 28, 1964, Biyernes, sa kuwarto sa Delmonico Hotel sa Park Avenue ug 59th sa New York City.

Gipatilaw ni Dylan ang Beatles sa marijuana. Si Starr nga maoy unang niyupyop nagsige og katawa. Samtang si McCartney niangkon nga nalunsay pag-ayo ang iyang panghunahuna ug niawhag sa iyang kaubanan pagsuwat sa tanan niyang gipanulti.

Si Dylan sa iyang bahin gisapot tungod sa kadaghan sa mga tawag sa telepono sa ilang kuwarto. Usa sa mga nanawag iyang gisiyagitan nga, “This is Beatlemania here!” Ug nangahubog silang tanan.

* * *

Human sa panagtagbo, nausab ang ilang musika. Sa 1965, si Dylan nipagawas sa iyang album nga “Bringing It All Back Home” nga nisunod na sa electric-rock sa Beatles nga nakapakugang pag-ayo sa iyang fans.

Sa ilang bahin, ang Beatles nipagawas sa mas seryuso nilang mga awit. Si Lennon nihimo sa “I’m a Loser” ug “Norwegian Wood” samtang si McCartney nisuwat sa “Yesterday” ug “Michelle.”

Sa pagkabungkag na sa Beatles, si Lennon nihisgot ni Dylan sa pipila sa iyang mga kanta, apil na sa “Give Peace A Chance” ug “God.” Human gipatay si Lennon, gipagawas ni Dylan ang iyang ika-35 nga album, ang Tempest, nga naglakip sa awit “Roll On John.” ([email protected])