P.5-M shabu nasamsam

COTABATO CITY, Maguindanao , Philippines - Tinatayang nasa P.5 milyong halaga ng shabu ang narekober ng mga sundalo ng Phil. Army at Phil. Drug Enforcement Agency kung saan dalawang sundalo at dalawang drug suspek ang nasugatan sa inilatag na operasyon laban sa mga armadong grupo sa Brgy. Lipao, bayan ng  Datu Paglas sa Maguindanao, kahapon ng umaga. Ayon kay Lt. Colonel Harold M. Cabunoc, battalion commander ng 33rd Infantry Battalion ng Phil. Army, nakasagupa ng mga sundalo ang armadong grupo na pinamumunuan ni Alyas Grasshoper. Umabot sa isang oras ang palitan ng putok na nagresulta sa pagkakasugat ng isang opisyal at isang sundalo. Dalawang miyembro naman ng grupo ang nasakote kung saan nakumpiskahan ng 80 gramo ng shabu, drug paraphernalia at armas.