Heat pinalamig ng Rockets
HOUSTON — Dalawang araw matapos talunin ang reigning league champion na Golden State Warriors, umiskor naman ang Rockets ng 99-90 panalo laban sa Miami Heat sa duwelo ng dalawang first-place NBA teams sa harap ng 18,050 fans sa Toyota Center Arena.
Humataw si James Harden ng team-high na 28 points habang nagtala si Chris Paul ng 16 points, 6 rebounds at 6 assists para sa Houston.
Nagdagdag naman si Eric Gordon ng 16 points mula sa bench kasunod ang 14 markers ni Clint Capela para sa Rockets.
Pinangunahan ni center Hassan Whiteside ang Southeast Division-leading na Heat mula sa kanyang 22 points at 13 rebounds.
Ang huling tatlong panalo ng Houston ay kontra sa mga first-place teams na Golden State, Minnesota at Miami.
Nagbalik sa line-up ng Rockets sina Trevor Ariza at Gerald Green, napatawan ng two-game suspension dahil sa pagsugod sa locker room ng Los Angeles Clippers matapos ang kanilang laro sa Staples Center arena.
Halatang napagod ang Miami matapos ang kanilang naunang 106-105 pagtakas kontra sa Charlotte Hornets.
Sa iba pang laro, tinalo ng Charlotte Hornets ang Sacramento Kings, 112-107; binigo ng Atlanta Hawks ang Utah Jazz, 104-90; tinakasan ng Memphis Grizzlies ang Philadelphia 76ers, 105-101 at iginupo ng Milwaukee Bucks ang Phoenix Suns, 109-105.
- Latest
