Halep sinibak si Davis sa Aussie Open

MELBOURNE, Australia-- Matapos malusutan ng tatlong beses, tiniyak ni Simona Halep na hindi na makakahirit si American Lauren Davis.

Matapos ang tatlong oras at 45 minuto ay tinalo ng top-ranked na si Halep si Davis, 4-6, 6-4, 15-13 sa kabila ng iniindang left ankle injury papasok sa fourth round.

Ang third set ay na­ngailangan ng dalawang oras at 22 minuto kung saan nagkaroon ng dalawang medical timeouts si Davis bago nakumpleto ni Halep ang kanyang unang match point.

“Definitely was a very tough match, so long,’’ wika ni Halep, dalawang beses nakapasok sa finals ng French Open ngunit na­bigong manalo ng Grand Slam singles title. 

Nagkaroon si Halep ng mga tsansang tapusin si Davis sa 9th, 11th at 15th game ng third set subalit nakakawala ang No. 76-ranked na si Davis, naisuko ang tatlong match points mula sa 0-40 sa serbisyo ni Halep sa 22nd game.

Naduplika ng laro nina Halep at Davis ang pinakamahabang women’s singles match sa Australian Open.

Tinalo ni Chanda Rubin si Arantxa Shanchez Vicario noong 1996 na umabot sa 48 games.

Apat na oras at 44 minuto naman ang kinailangan ni Francesca Schiavone para talunin si Svetlana Kuznetsova noong 2011.

Lalabanan ni Halep ang mananalo kina local hope Ashleigh Barty at Naomi Osaka sa fourth round.

Samantala, umabante rin sa fourth round si U.S. Open finalist Madison Keys matapos kunin ang 6-3, 6-4 panalo laban kay Ana Bogdan.

Susunod niyang makakaharap si No. 8 Caroline Garcia, sumibak kay Aliaksandra Sasnovich 6-3, 5-7, 6-2.