Tabora, Biado, Ancajas 2017 PSA Athletes of the Year

MANILA, Philippines — Sa unang pagkakataon matapos noong 2015 ay tatlong Filipino athletes ang magkakasabay na hahawak sa Philippine Sportswriters Association (PSA) Athletes of the Year trophy.

Pagsasaluhan nina boxing champion Jerwin Ancajas, World Cup bow­ling queen Krizziah Lyn Tabora at 9-ball titlist Carlo Biado ang pinakamataas na karangalang ibibigay sa pagdaraos ng SMC-PSA Annual Awards Night sa Pebrero 27 sa Maynila Hall ng Manila Hotel.

Nagposte ng mga pa­nalo sina Ancajas, Tabora at Biado para ipakita ang world-class talent ng mga Filipino athletes.

“The PSA is proud to announce Jerwin Ancajas, Krizziah Tabora, and Carlo Biado as its Athletes of the Year for 2017. They are truly deserving of the award for the great honor they brought to the country with their respective victories in the world stage,” sabi ni PSA president at SPIN.ph editor Dodo Catacutan.

Ito ang unang pagkakataon na hinirang sina Ancajas, Tabora at Biado bilang Tapa King-Athlete of the Year na ipagkakaloob ng pinakamatandang media organization sa bansa sa annual tradition na inihahandog ng MILO at Cignal TV.

Noong 2015 ay hinirang sina boxers Nonito Do­naire Jr. at Donnie Nietes at golfer Miguel Ta­­buena bilang PSA Co-Athletes of the Year.

Ang honor list ay kina­bibilangan ng President’s Award, Executive Award, National Sports Association (NSA) of the Year, major awardees at iba pa na ibibigay sa formal ceremony na sinusuportahan ng Phi­lippine Sports Commission (PSC) bilang major sponsor kasama ang Mighty Sports, Rain or Shine, Globalport at Philippine Basketball Association (PBA).

Binuksan ng 25-anyos na si Ancajas ang 2017 sa matagumpay niyang pagdedepensa sa hawak na International Boxing Federation (IBF) junior bantamweight title via seventh-round stoppage (technical decision) kay Mexican Jose Alfredo Rodriguez sa Macau noong Enero.

Naipagtanggol muli ng tubong Panabo, Davao del Norte na si Ancajas, lu­malaban sa ilalim ng Manny Pacquiao Promotions, ang kanyang titulo laban kina Japanese Teiru Kinoshita sa Brisbane, Australia (6th round TKO) at Irishman Jamie Conlan sa Belfast, Ireland (6th round TKO).

Samantala, noong Nobyembre ay sinikwat ni Tabora ang 53rd Qubica AMF Bowling World Cup sa Hermosillo, Mexico na tumapos sa 14-taon pagkauhaw ng bansa.

Inungusan ni Tabora si Siti Safiyah Amirah Abdul Rahman ng Malaysia sa final, 236-191 para ma­ging pang-limang Philippine bowler na nanalo ng World Cup matapos si Paeng Nepomuceno, ang yumaong si Lita dela Rosa at sina Bong Coo at CJ Suarez.

Dalawang linggo naman bago ang Araw ng Pasko ay inangkin ni Biado ang korona ng World 9-Ball matapos biguin ang kababayang si Roland Garcia, 13-5 sa all-Filipino final sa Doha, Qatar.

Si Biado, ang gold medal winner sa Southeast Asian Games sa Kuala Lumpur, Malaysia at nagkampeon sa World Games sa Poland, ay kahanay ngayon nina legendary Efren ‘Bata’ Reyes (1999), Alex Pagulayan (2004), Ronnie Alcano (2006) at great Francisco ‘Django’ Bustamante (2010) bilang Pinoy na naghari sa naturang world 9-ball tournament.