Beermen sisimulan na ang kampanya vs Fuel Masters

MANILA, Philippines — Bubuksan ng San Mi­guel ang kanilang pagha­hangad sa ikaapat na sunod na korona sa All-F­lipino Cup sa pagdribol ng 2018 PBA Philippine Cup nga­yong gabi sa Smart Araneta Coliseum.

Sasagupain ng Beermen ang Phoenix Fuel Masters sa nag-iisang laro sa ganap na alas-6:30 ng hapon matapos ang isang makulay na opening ceremonies.

Ang mga muses na magpaparada ay sina Fil-Aussie model Jodie Tarasek (San Miguel), cosplayer Myrtle Sarrosa (Barangay Ginebra), dating Ms. World-Philippines na si Laura Lehmann (TNT Katropa), actress Rhian Ramos (Phoenix), volleyball star Rachel Anne Daquis (NLEX), Phoemela Baranda (Kia), beauty queen at model Hillarie Parungao (Globalport) at commercial model-actress Ashley Ortega (Blackwater).

Muling ipaparada ng Beermen sina four-time MVP June Mar Fajardo, one-time MVP Arwind Santos, Alex Cabagnot, Chris Ross at Marcio Lassiter.

Si Fil-German Christian Standhardinger, ang hinirang na No. 1 overall pick ng 2017 PA Rookie Draft, ay sa Mayo pa ng 2018 maglalaro para sa San Miguel dahil sa kanyang six-month contract sa Hong Kong team sa ASEAN Basketball League.

Determinado naman ang Phoenix na ma­ka­pasok sa kanilang kauna-unahang PBA Finals appearance nang kunin si Louie Alas bilang head coach kapalit ni Ariel Vanguardia.

Makakatuwang ni Alas sa bench ng Phoenix si Topex Robinson, mentor ng Lyceum Pirates sa NCAA at kasama niya sa coaching staff sa Alaska.

Itatapat ng Fuel Masters si Gilas Pilipinas shoo­ting guard Matthew Wright kasama sina veterans RJ Jazul, Jeff Chan at JC Intal at si dating La Salle Green Archers power forward Jason Perkins na kanilang first-round draft pick.

Inaasahang makakatulong din sa kampanya ng Phoenix sina dating Kia star guard LA Revilla,  Rey Guevarra, Alaska center Jaypee Mendoza at NAASCU standout Jonjon Gabriel.