Team effort susi ng Ateneo papasok sa Finals
MANILA, Philippines — Tiwala sa isa’t isa ang naging armas ng Ateneo de Manila University para muling makatungtong sa Finals ng UAAP men’s basketball tournament.
Nagsanib-puwersa ang Blue Eagles sa huling sandali ng laro upang itakas ang 88-84 overtime win laban sa Far Eastern University Tamaraws para masungkit ang huling tiket sa best-of-three championship series.
Nanguna sina Matt Nieto at center Isaac Go sa nagtala ng mga krusyal na puntos para dalhin ang kanilang tropa sa panalo.
Humataw si Nieto ng 16 puntos kabilang ang isang tres na nagdala sa Blue Eagles sa 85-80 kalamangan sa huling 45 segundo ng laro.
“I want to thank coach Sandy for giving me the confidence. Even though I was down in the game, he keeps on saying na ‘kaya mo pa yan, hindi tayo puwedeng matalo. Ikaw pa, kaya mo ‘yan, may tiwala ako sa iyo,” ani Nieto.
Sa kabilang banda, si Go naman ang bumanat ng umaatikabong tres na siyang nagdala sa laban sa overtime.
“I’m thankful to my coaches for believing in me. He had more confidence in me than I had in myself. My teammates and the coaching staff helped me make that shot,” sabi ng 21-anyos na si Go.
Ngunit haharap sa panibagong pagsubok ang Blue Eagles.
Sa pagkakataong ito, tatangkain ng Ateneo na hubaran ng korona ang nagdedepensang De La Salle University.
Umaasa ang kampo ng Blue Eagles na sapat ang isang araw na ensayo upang bumuo ng solidong plano at madala ang magandang momento laban sa Green Archers sa pagsisimula ng serye bukas sa Mall of Asia Arena sa Pasay City.
Nauna nang inihayag ni La Salle mentor Aldin Ayo na magiging handa ang kanyang tropa sinuman ang makalaban nito sa UAAP Finals.
“Whoever is deserving, we’re going to play against them. There’s no room for complacency. We just have to keep on working,” wika ni Ayo.
Samantala, tuluyan namang nagbitiw sina Derek Pumaren at Boy Sablan sa University of the East Red Warriors at University of Santo Tomas Tigers, ayon sa pagkakasunod.
- Latest