Vasquez 3 record ang binasag
Sina Philippine Swimming League President Susan Papa at Secretary General Maria Susan Benasa kasama ang Alavy-Chafi sisters na sina Elle at Ehm.
125th PSL Series Bicol Leg
MANILA, Philippines — Apat na bagong rekord ang naitala kahapon tampok ang tatlo mula kay Julius Glen Vasquez sa 125th Philippine Swimming League (PSL) National Series - 4th Commodore Jaime Jimenez Sr. Short Course Swim Meet na ginanap sa Mariner’s Polytechnic Colleges Foundation sa Rawis, Legazpi City.
Bitbit ang bandila ng Naga Amateur Swimming Association, binasag ni Vasquez ang rekord sa 100m Individual Medley sa pamamagitan ng isang minuto at 11.98 segundo sa boys’ 11-year event.
Sinundan ito ni Vasquez ng dalawa pang record-breaking performance sa 50m butterfly tangan ang 30.36 segundo at 50m freestyle sa bilis na 28.69 segundo.
Nagparamdam din ng puwersa si Palarong Pambansa veteran James Peter Hernandez ng Albay Falcons Swim Club nang wasakin nito ang lumang rekord sa boys’ 15-over 50m backstroke kung saan naisumite nito ang 24.38 segundo.
Nakahirit din ng gintong medalya sina Marc Bryan Dula ng Wisenheimer Academy (boys’ 10-year 50m freestyle), Diliman Preparatory School standouts Elle Alavy-Chafi (girls’ 11-year 50m freestyle) at Albert Sermonia II (boys’ 12-year 50m freestyle).
Wagi rin ng medalya sina Dinry Fugentes, Nadler Bolima, Christian Trump Luistro, John Salinel, Kirsten Agao, Lee Grant Cabral, Alea Tence, Margarette Dee, Isis Arnaldo, Lhaarny Agnas at Alfonso Cabanela.
Ang iba pang medallists ay sina Angel Chan, Leonardo Dalman III, Reymond De Leon, Carl Jude Tence, Heleina Glorioso, Ethan Fajardo, Alfonso Cabanela, Zyrilyn Anonuevo, John Mahayhay, Jan Talavera, Gian Nunez at Maricris Serrano.
“This grassroots program of the PSL helps a lot of coaches, parents and swimmers sustain their interest to continue to train, as they are very motivated as they keep on improving their times inch by inch in each competition and winning,” ani PSL President Susan Papa.
Matapos ang torneo, inaasahang papangalanan ng PSL ang mga swimmers na nagkwalipika para sa mga international competitions na lalahukan ng asosasyon sa Amerika, Australia, United Arab Emirates, Canada, Thailand, Singapore, Hong at Japan.
- Latest
