Gilas ibinitin uli ni Blatche
MANILA, Philippines — Patuloy ang ginagawang pambibitin ni naturalized player Andray Blatche sa Gilas PIlipinas at kay head coach Chot Reyes.
Hanggang kahapon ay wala pang Blatche na dumadating sa airport mula sa China kung saan siya naglalaro para sa Xinjiang Flying Tigers sa Chinese Basketball Association (CBA).
Noong nakaraang Linggo ay hindi dumating ang NBA power forward taliwas sa kanyang Instagram post.
Matatandaang hindi naglaro ang 6-foot-11 na si Blatche sa kampanya ng Nationals sa nakaraang 2017 FIBA Asia Cup sa Beirut, Lebanon kaya hinugot ni Reyes si Fil-German Christian Standhardinger.
Pinaghahandaan ng Gilas Pilipinas training pool ang FIBA Basketball World Cup 2019 Asian Qualifiers.
Nauna nang binuksan ni Reyes ang training camp ng Gilas Pilipinas noong Nobyembre 3 sa Meralco Gym bago magdaos ng isang three-day camp sa Taal Esplendido sa Tagaytay City na natapos noong Miyerkules.
Ang mga sumama sa nasabing kampo ay sina four-time PBA Most Valuable Player June Mar Fajardo, Japeth Aguilar, Raymund Almazan, Troy Rosario, Gabe Norwood, Allein Maliksi, Matthew Wright, Calvin Abueva, Mac Belo, Kiefer Ravena, RR Pogoy, Carl Bryan Cruz, Kevin Alas at Jayson Castro.
Sila ay bahagi ng 23-man training pool na pinangalanan ni Reyes na paghuhugutan niya ng 12 players para sumabak sa naturang ‘home-and-away window series ng FIBA Asia Qualifiers.
Nakatakdang magtungo ang grupo sa Tokyo sa Martes para sa kanilang bakbakan ng Japan sa Nobyembre 24 sa Komazawa Gymnasium.
- Latest
