Mojdeh nagpakilala sa Batang Pinoy
4 ginto, 1 pilak ang nilangoy sa unang paglahok
MANILA, Philippines — Itinanghal na Most Bemedalled Female Swimmer si Philippine Swimming League (PSL) standout Micaela Jasmine Mojdeh sa 2017 Batang Pinoy Luzon Qualifying swimming competition na ginanap sa Vigan, Ilocos Sur.
Pambato ng Parañaque City, sumisid ang 11-anyos na si Mojdeh ng apat na ginto at isang pilak para mangibabaw sa girls’ 12-under event.
Magarbong sinimulan ni Mojdeh ang kampanya nito matapos manguna sa 100m butterfly sa bilis na isang minuto at 8.52 segundo para pataubin sina Puerto Princesa City bet Maglia Dignadice (1:11.71) at Laguna tanker Mariah Ubando (1:16.27) na parehong 12-anyos.
Muling umariba si Mojdeh sa 400m Individual Medley nang irehistro nito ang 5:35.87 - limang segundong mas mabilis kay silver medalist Samantha Corpuz ng La Union na nagtala ng 5:40.90.
Nakaginto rin si Mojdeh sa 50m butterfly at 200m butterfly habang pumangalawa ito sa 200m breaststroke.
Galing si Mojdeh sa matamis na kampanya sa 2017 Buccaneer Invitational Swimming Championship sa Tokyo, Japan kung saan bumasag ito ng tournament records para tanghaling Most Outstanding Swimmer sa girls’ 11-12.
“Medyo nakakapagod dahil from Japan dumiretso agad kami sa Vigan. But I’m happy with my performance here in Batang Pinoy. I was able to improve my times and I’m looking forward to the National Finals next year. I still have a few months left to prepare for that,” wika ni Mojdeh na siyang reigning PSL Female Swimmer of the Year at Tony Siddayao awardee sa Philippine Sportswriters Association Annual Awards Night.
Sasabak si Mojdeh sa Batang Pinoy National Finals na gaganapin sa susunod na taon kung saan makakasagupa nito ang pambato ng Visayas at Mindanao na maglalaban-laban para makahirit ng tiket sa national junior team.
“It’s was an exhausting week for us. We were in Japan last week then we immediately went here in Vigan for the Batang Pinoy then we went to Laoag for the PSL National Series,” wika ni Joan Mojdeh ang nanay ni Micaela Jasmine.
- Latest