NSAs sa POC: Malinis na training facilities itayo
MANILA, Philippines — Hiniling ng grupo ng mga NSAs (National Sports Associations) sa Philippine Sports Commission na magtayo ng malinis na training facilities para sa kanilang mga atleta, kasama na ang disenteng living quarters.
Ang naturang grupo ang siya ring nagtutulak ng reporma sa Philippine sports kamakailan.
Naging isyu sa nakaraang mga taon ang estado ng pamumuhay ng mga national athletes at habang sinubukan itong resolbahan ng PSC ay hindi pa rin kuntento ang mga kasalukuyang nakatira sa Rizal Memorial Sports Complex at Philsports Arena.
Iginiit pa ng mga kinatawan ng 18 NSAs, ayaw tawaging isang rebel group, sa PSC na aksyunan ang medical o health care para sa mga atleta.
Gusto rin ng grupo na pagbutihin ng PSC ang operasyon ng NSA affairs, gawing epektibo ang accounting process at magkaroon ng mas mahusay na systematic procurement process para sa kanilang mga equipment at supplies.
Ipinarerebisa rin ng grupo ang kalendaryo ng PSC at tiyaking hindi makakasabay ang kanilang mga kompetisyong gagawin sa torneo ng mga NSAs.
Kasama rito ang Batang Pinoy, Palarong Pambansa at Philippine National Games.
Naniniwala ang mga NSAs na ang lahat ng ito ang nagdaragdag sa pagbulusok ng Philippine sports sa international arena kagaya ng Southeast Asian Games kung saan tumapos sa sixth place ang bansa.
Sinabi ni PSC chairman William Ramirez na ginagawa na ng government sports agency ang lahat para resolbahin ang nasabing mga isyu.
Nadiskaril ang plano ng PSC na magtayo ng isang five-star canteen para sa mga atleta at ang pagbili ng high-standard medical equipment na nagkakahalaga ng P100 milyon. Nasa plano rin ng PSC ang renobasyon ng RMSC, Philsports at Teachers Camp sa Baguio City.
- Latest
