Crawford ikakasa ni Arum kay Horn
MANILA, Philippines — Dahil posibleng tapos na ang promotional contract ni Manny Pacquiao sa Top Rank Promotions, hindi na inaasahan ni Bob Arum na matutuloy ang rematch ng Filipino boxing legend kay Australian world welterweight titlist Jeff Horn sa 2018.
Plano ni Arum na kausapin ang kampo ni light welterweight superstar Terence Crawford, minsan na niyang tinangkang itapat kay Pacquiao, para isagupa kay Horn.
“We’re going to meet with Terrence and we’re going to lay out a plan starting early next year leading towards a welterweight championship match, probably with Jeff Horn,” sabi ni Arum sa panayam ng BoxingScene.com
Tinanggihan ni Pacquiao ang rematch kay Horn, umagaw sa kanyang hawak na World Boxing Organization welterweight belt noong Hulyo 2 sa Suncorp Stadium sa Brisbane, Australia, sa Nobyembre 11.
Nakasaad sa kanilang fight contract na maaari lamang gawin ang rematch sa Australia at hindi sa Pilipinas kagaya ng gusto ni Pacquiao.
Determinado sana ang Senador na gawin ang ikalawang bakbakan nila ni Horn sa Philippine Arena sa Bocaue, Bulacan.
Ang laban sa 29-anyos na si Horn noong Hulyo ang pinakahuli ni Pacquiao sa ilalim ng Top Rank ni Arum.
At hindi na prayoridad ng 85-anyos na veteran promoter ang 38-anyos na Filipino boxing legend na tinulungan niyang maging kampeon sa walong magkakaibang weight divisions.
- Latest