Gilas cadets target ang 2-0 record kontra sa Myanmar
KUALA LUMPUR -- Iniwanan ni Bobby Ray Parks, Jr. ng Gilas cadets ang player ng Thailand. (Kuha ni Jun Mendoza)
KUALA LUMPUR -- Matapos pabagsakin ang Thailand ay lalabanan naman ng Gilas Pilipinas cadets ngayon ang Myanmar para sa pagpuntirya sa ikalawang sunod na panalo sa men’s basketball event ng 29th Southeast Asian Games dito sa MABA Stadium.
Inaasahang makakatulong si small forward Carl Bryan Cruz, miyembro ng Gilas Pilipinas na tumapos sa No. 7 sa nakaraang 2017 FIBA Asia Cup sa Lebanon, sa pagtarget ng Nationals sa record na ika-17 gold medal sa biennial games.
Tinalo ng Gilas cadets ang Thailand, 81-74, sa opening game noong Linggo.
Naiwanan sa 69-71 sa huling apat na minuto ng laro, sinandigan ni head coach Jong Uichico sina Keifer Ravena at Baser Amer para agawin ang bentahe laban sa mga Thais.
Tumirada si Ravena ng dalawang free throws at clutch jumper para ibigay sa Gilas cadets ang 75-71 kalamangan kasunod ang layup ni Amer para selyuhan ang panalo.
Samantala, haharapin ng Perlas Pilipinas ang Myanmar sa women’s basketball.
Nagtala sina Afril Bernardino, Janine Pontijos at Camille Sambile ng pinagsamang 39 points para gibain ang Singapore, 88-54, noong Linggo.
- Latest
