Pinoy boxers uupak na

SEAG Boxing Event

MANILA, Philippines -  Sisimulan na ng natio­nal boxing team ang pagsuntok sa gintong medalya sa paglarga ng boxing competition ngayong araw sa 2017 Southeast Asian Games na gaganapin sa Mitec Hall 8 sa Kuala Lumpur, Malaysia.

Unang mapapalaban sina veteran international campaigners Mario Fernandez, Ian Clark Bautista at Eumir Felix Marcial na sasabak sa kani-kanilang weight classes.

Sasabak ang 22-anyos Binalbagan, Negros Occidental pride na si Bautista laban kay Abdul Salam Kasim ng Malaysia sa quarterfinals ng men’s flyweight division habang sasagupain naman ni Marcial si Nguyen Mang Cuong ng Vietnam sa hiwalay na quarterfinal match sa men’s middleweight class.

Kung mananalo sina Bautista at Marcial, makasisiguro na ang dalawa ng tansong medalya.

Makakatipan naman ni two-time SEA Games gold medalist Fernandez si Maung Nge ng Myanmar sa first round ng men’s bantamweight class.

“Malampasan sana natin ang mga una nating kalaban and, hopefully, they all make it to the semis,” wika ni Association of Boxing Alliances in the Philippines e­xecutive director Ed Picson.

Lalarga naman si Carlo Paalam, ang pinakabatang miyembro ng boxing team na may edad na 19, sa men’s flyweight category.

Si Paalam ang pu­ma­lit kay Rogen Ladon na nagpasyang lumahok sa prestihiyosong AIBA World Championships na gaganapin sa Agosto 25 hanggang Setyembre 3 sa Hamburg, Germany.

Nakasiguro si Paalam ng opening-round bye para awtomatikong u­mabante sa quarterfinals kung saan makakalaban nito si Muhamad Fuad B.M. Redzuan ng Malaysia bukas (Lunes).

Magtatangka rin sa medalya si Filipino-British recruit Marvin Tupaz na susuntok sa quarterfinals laban kay Felix Merlin Martinez ng Cambodia sa men’s light heavyweight category.