PH men’s volley team biyaheng Korea ngayon
MANILA, Philippines - Aalis ngayong araw ang Philippine national men’s volleyball team patungong Suwon, South Korea para sa kanilang dalawang linggong pagsasanay bilang paghahanda sa parating na 29th Southeast Asian Games.
Sa pangunguna ni team captain Johnvic de Guzman lilipad ang koponan sa alas-2:35 ng hapon sakay ng Philippine Air Lines upang paghandaan ang SEAG battle sa Kuala Lumpur, Malaysia sa Agosto 19-30.
Tiniyak ni national men’s team head coach Sammy Acaylar na magiging mahigpit at rigid ang training nila sa South Korea kung saan magkakaroon din sila ng mga tune-up matches laban sa iba’t ibang koponan sa loob ng Sungkyunkwan University.
“Pagdating namin sa Korea may three days sila at tatlong beses mag-e-ensayo. Then another three days na may twice a day practice for morning and afternoon,” sabi ni Acaylar.
“Kumbaga, Monday, Wednesday, Friday three times of practice sessions. Then Tuesday, Thursday, Saturday, two times,” dagdag ni Acaylar.
Gagamitin ng nationals ang mga facilities ng SKK University sa kanilang training at tune up matches at practice games naman sa Hwasung volleyball court at Suwon Indoor Gym.
Makakaharap ng koponan ang mga club teams ng Hwasung City kabilang na ang Korean national U-19 team, Korean Universiade national squad at SKK University squad.
Target ni Acaylar na mapabuti ang speed at floor defense nina Relan Taneo at lahat ng 12 miyembro ng national squad.
Ang Philippine men’s volleyball team ay kasama sa bracket ang mga malalakas na teams na Vietnam at Indonesia sa SEAG.
Bukod kay De Guzman, ang iba pa sa koponan ay sina Rey Taneo, Bryan Bagunas, PVL MVP Ranran Abdilla, Mark Alfafara, Alden Cabaron, Reyson Fuentes, Bonjomar Castel, Herschel Ramos, Jack Kalingking, Greg Dolor, Peter Quiel at John Eduard Carascal.
- Latest
