Dennis ayaw mag-party sa birthday

Birthday ni Dennis Trillo sa Friday, May 12 at walang kokontra sa sasabihin naming birthday presentation niya ang Mulawin vs. Ravena na pilot sa May 22.  Walang party si Dennis sa dahil bukod sa hindi mahilig dito ay may taping siya ng fantaserye.

Bawal din siyang magpuyat on his birthday dahil kinabukasan ay pupunta siya ng Legaspi for work. 

Sa May 15 naman ay birthday ni Jennylyn Mercado. Hindi kaya pagsasabayin na lang nila ang pagdiriwang ng kanilang birthday?

Anyway, pinalalabas na ang teaser ng Mulawin vs. Ravena na sila pa lang nina Derrick Monasterio at Miguel Tanfelix ang ipinakitang lumilipad at tila nagsagupaan sa ere. Maganda ang feedback sa teaser. 

Nabanggit ni Dennis na ayaw sana niyang tanggapin ang project dahil nagawa na niya ito at ayaw nang mag-ulit ng project. Pero nang mabasa ang script ni Don Mi­chael Perez ay nakita nitong malayo pa ang tatakbuhin ng story, kaya tinanggap niya ang offer.

Megan hindi tinatablan ng selos 

Ang ganda ng photo na nakita namin sa Instagram (IG) account ni Mikael Daez kasama ang GF niyang si Megan Young at si Janine Gutierrez na leading lady niya sa Legally Blind. Ang caption ni Mikael sa isang photo ay, “One side is all about tra­velling the world the blind side you can catch Mondays to Fridays on GMA.”

Ito ang maganda sa relasyon nina Mikael at Megan, walang selosan at kahit sino ang makapareha ni Mikael, kahit ang sexy pang si Andrea Torres at ang magandang si Janine ay hindi pinagseselosan. Pumayag pa nga si Megan na makasama si Andrea sa Alyas Robin Hood at tiyak papayag ding makatrabaho si Janine.

Nabanggit din ni Megan sa presscon ng Our Mighty Yaya na pinapanood niya ang Legally Blind.

On Mikael’s part, wala siyang dapat ipagselos kay Zoren Legaspi na kapareha ni Megan sa Our Mighty Yaya dahil kahit mag-asawa ang role nila wholesome ang movie at wala silang kissing scene.

This Wednesday na ang showing ng Our Mighty Yaya sa direction ni Joey Reyes at produced ng Regal Entertainment.

Arra mas gusto ng nanay ni Ruru!

In fairness, hindi pa-showbiz ang sagot nina Gabbi Garcia at Arra San Agustin ‘pag tinatanong tungkol sa isa’t isa. Pareho sila ng sagot na hindi pa sila friends at hindi nag-uusap maliban kung kailangan sa eksena. Ito’y kahit magkasama sila sa Encantadia at kung minsan ay magkasama sila sa eksena at nag-uusap.

Si Ruru Madrid ang dahilan kung bakit may ilangan sa dalawang beauties. Ka-love team ni Ruru si Gabbi at sinasabing may relasyon dati. Nag-break daw ang dalawa at sa pagpasok ni Arra sa Encantadia, sa kanya raw nabaling ang atensyon at puso ni Ruru.

May tsika pa ngang nakita sa Tagaytay sina Ruru at Arra at itinanong namin ito kay Arra. Hindi nito idinenay na nagpunta sila ni Ruru sa Tagaytay pero may mga kasama sila.

Ang ikinagulat namin ay ang sinabi ni Arra na ang mother ni Ruru ang nag-imbita sa kanyang sumama sa Tagaytay. Ang ibig bang sabihin nito, pabor ang mom ni Ruru sakaling may ligawang mangyari sa da­lawa?