PSL All-Filipino Conference: Ika-2 dikit dale ng Tornadoes
MANILA, Philippines – Mainit pa rin ang makina ng Grand Prix champion Foton nang sagasaan nito ang reigning titlist Petron sa pamamagitan ng 25-23, 25-18, 25-18 panalo kagabi sa 2016 Philippine Superliga (PSL) All-Filipino Conference women’s volleyball tournament sa The Arena sa San Juan City.
Ito ang ikalawang sunod na panalo ng Foton sa second round upang saluhan sa unahan ng standings ang F2 Logistics na may parehong 2-0 marka.
Inupuan ni University of Santo Tomas standout Ennajie Laure ang driver’s seat ng Foton nang umani ito ng 17 puntos na nabuo mula sa 14 attacks, dalawang blocks at isang ace.
“Kailangan naming mag-focus sa loob kasi nawawala focus namin minsan. Tuluy-tuloy ang laro namin kaya focus lang kami sa bawat laro. Kailangan ready kami both on physical and mental aspects,” wika ni Laure.
Mataas din ang enerhiya ni open hitter Cherry Ann Rondina na nagpasabog ng 15 puntos - lahat sa attack line.
Gumulong sa 0-2 ang Petron para samahan ang RC Cola-Army (0-2) sa ilalim.
Sa classification round, nahablot ng Generika ang ikalawang panalo nito matapos payukuin ang Amy’s Kitchen, 24-26, 25-13, 25-19, 25-14.
Nagsilbing tagapagligtas ng Lifesavers si Chlodia Cortez na pumalo ng 13 attacks, dalawang blocks at dalawang aces habang ibinaon ni Ria Meneses ang 12 hits, dalawang blocks at isang ace.
Wala pa ring panalo ang Amy’s na lumubog sa 0-3 rekord.
Malakas din ang puwersang inilatag ng Cignal nang ilubog nito ang Standard Insurance-Navy, 25-15, 25-22, 25-18, para umangat sa 2-1 rekord.
“I have to accept the fact that we failed to have a strong start. It just so happened that we were stacked against the heavyweights in our first three games. But with this win, I’m so happy that we’re back on track. The goal now is to become the top team in Group B and go for the fifth-place finish,” turan ni Cignal coach Sammy Acaylar.
Sumadsad sa 1-1 ang Navy.
Maghaharap sa huling araw ng second round ang Generika at Navy ngayong araw sa alas-2 habang magtutuos naman ang Foton at F2 Logistics sa alas-4 kasunod ang pukpukan ng four-time champion RC Cola-Army at Petron sa alas-6 ng gabi.
- Latest
