Blatche handa nang mag-ensayo sa Gilas
MANILA, Philippines – Halos ilang linggong naghintay ang Samahang Basketbol ng Pilipinas at si head coach Tab Baldwin para sa pagdating ni Andray Blatche.
Ngayon ay maaari na silang matulog ng mahimbing.
Dumating sa bansa ang naturalized center noong Biyernes ng gabi at kaagad nagtungo sa ensayo ng Gilas Pilipinas sa Kerry’s Gym sa The Fort kahapon.
Hindi siya pinasama ni Baldwin sa ginagawang pagsasanay ng Nationals.
Sa kanyang nakita ay kumbinsido si Baldwin na nasa tamang kondisyon at pangangatawan ang 6-foot-11 na si Blatche kumpara nang maglaro siya noong 2015 FIBA Asia Championship sa Changsha, China.
“I’m happy to welcome Dray back to the team. It’s time to work as a team and find the greatness within this bunch,” sabi ni Baldwin kay Blatche, isang NBA veteran na naglaro para sa Washington Wizards at Brooklyn Nets.
Si Blatche ang muling aasahan ng Gilas Pilipinas sa pagsabak sa bigating 2016 FIBA Olympic Qualifying Tournament na nakatakda sa Hulyo 5-10 sa Mall of Asia Arena Arena sa Pasay City.
Para makuha ang nag-iisang tiket para sa Olympic Games sa Rio de Janeiro, Brazil sa Agosto ay kailangang magkampeon ang Nationals sa Manila OQT na sasalihan din ng France, New Zealand, Turkey, Canada at Senegal.
Samantala, pinamunuan naman ni Los Angeles Lakers Fil-Am guard Jordan Clarkson ang paglulunsad sa bagong unipormeng isusuot ng Nationals sa Manila OQT.
“Just being here to support, I want to be with the team,” wika ng 6’4 na si Clarkson.
- Latest
