Warriors ayaw pang sumuko serye inilapit sa 3-2

OAKLAND, Calif.--Sa likod ni NBA MVP Stephen Curry, nalampasan ng Golden State Warriors ang tangkang pagsibak sa kanila ng Oklahoma City Thunder.

Nagpasabog si Curry ng 31 points, habang umiskor ng 27 markers si Klay Thompson sa 120-111 panalo ng Warriors laban sa Thunder sa Game 5 ng Western Conference finals.

Sa kanyang  pang-1,248 career postseason point sa third period ay nalampasan ni Curry si Wilt Chamberlain (1,246) para sa second place sa playoff scoring list ng kanilang prangkisa.

“We’re not going home! We’re not going home!” sigaw ni Curry matapos ang laro.

Nagsalpak si Curry ng isang layup para ilapit ang Warriors sa 2-3 sa kanilang best-of-seven series ng Thunder.

Muling tatangkain ng Thunder na tapusin ang serye sa Game 6 sa Oklahoma City sa Sabado.

Hangad naman ng Gol­den State na ma­ging pang-10 koponan na nakabangon mula sa 1-3 pagkakabaon sa serye.

Naglista si Curry ng 9 for 20 at itinala naman ni Thompson ang kanyang ika-11 na 20-point game sa ikalawang sunod na laro sa postseason bagama’t may masamang 2 for 9 shooting sa 3-point range.

Humakot si Draymond Green ng 11 points at 13 rebounds at ibinabad ni coach Steve Kerr si center Andrew Bogut at humakot ang 7-footer ng playoff career-high 15 points at 14 rebounds para sa kanyang ikalawang double-double sa postseason.

Kumamada naman si Kevin Durant ng 40 points at nagtala si Russell Westbrook ng 31 points, 8 assists, 7 rebounds at 5 steals para sa Thunder, hangad ang kanilang pang-limang NBA Finals appearance sa franchise history para sa tsansang makamit ang ikalawang korona matapos noong 1978-79 kung aan nagkampeon ang Seattle SuperSonics.

Nauna nang dinurog ng Thunder ang Warriors, nagtayo ng record na 73 wins sa regular season, sa Game 3 at 4 sa Oklahoma City sa pinagsamang 52 points.

Ang three-point shot ni Durant sa huling 4:34 minuto sa fourth period ang naglapit sa Thunder sa 98-103 na sinagot ng three-point play ni Curry para muling ilayo ang Warriors sa 106-98.