Meralco lider na lifetime ban at P250k multa ipinataw ng PBA kay Johnson
MANILA, Philippines – Sa laro kung saan napatawan si import Ivan Johnson ng lifetime ban ng Philippine Basketball Association ay nalasap ng nagdedepensang Talk ‘N Text ang kanilang unang kabiguan.
Sinamantala ng Meralco Bolts ang pagkakatalsik ni Johnson bunga ng ikalawang technical foul sa second period para talunin ang Tropang Texters, 88-84 at solohin ang liderato ng 2016 PBA Commissioner’s Cup kagabi sa Philsports Arena sa Pasig City.
“Ivan Johnson getting thrown out of the game, well it worked to our advantage,” sabi ni Meralco coach Norman Black. “Once again we really preached to our players to adjust on how the game is governed to avoid an Ivan Johnson.”
Umiskor si Cliff Hodge ng 16 points, habang nagtala si Jared Dillinger ng 14 points at 11 rebounds at nagdagdag si import Arinze Onuaku ng 14 points at 7 boards para sa 2-0 baraha ng Bolts.
Nag-ambag si Bryan Faundo ng 11 points kasunod ang tig-10 nina Baser Amer at Jimmy Alapag.
Matapos masibak sa laro dahil sa ikalawang technical foul mula sa kanyang flagrant foul penalty 1 kay Meralco big man Faundo sa dulo ng second quarter ay minura ni Johnson si PBA Commissioner Chito Narvasa habang papalabas ng court.
At bago pa man matapos ang naturang laro ay nagbigay na ng kanyang statement si Narvasa tungkol sa NBA veteran na nauna nang napatawan ng one-game suspension at multang P50,000 dahil sa pagtulak sa mukha ni JP Erram at pagsuntok kay Frank Golla ng Blackwater sa kanilang tune-up game noong Enero 30.
“For addressing the commissioner with profanities and showing utter disrespect of authority, Ivan Johnson has been banned for life from the PBA,” sabi ni Narvasa kay Johnson na pinagmulta rin ng P250,000 at nauna nang napatawan ng lifetime ban sa Korean Basketball League.
Si Johnson ang ikalawang import sa PBA na nabigyan ng lifetime ban matapos si dating Petron reinforcement Renaldo Balkman na sinakal ang kanyang kakamping si Arwind Santos noong Marso ng 2013.
Samantala, kasalukuyan pang naglalaban ang Rain or Shine Elasto Painters at Star Hotshots habang sinusulat ito.
Meralco 88 - Hodge 15, Dillinger 14, Onuaku 14, Faundo 11, Alapag 10, Amer 10, Newsome 9, David 3, Al-Hussaini 2, Bono 0, Buenafe 0, Caram 0, Hugnatan 0, Nabong 0.
Talk ‘N Text 84 - Castro 25, Fonacier 15, Johnson 9, Williams 8, De Ocampo 7, Reyes R. 7, Carey 6, Nuyles 4, Tautuaa 3, Ababou 0, Rosser 0, Reyes J. 0, Aban 0.
Quarterscores: 16-20; 33-26; 61-55; 88-84.
- Latest
