San Miguel lalapit sa outright semis vs Mahindra
MANILA, Philippines - Ang pagsosolo sa liderato at pagnanais na makalapit sa outright semifinals ticket ang puntirya ng nagdedepensang San Miguel, habang hangad ng Globalport na mapalakas ang tsansa para sa isang quarterfinals seat.
Sasagupain ng Beermen ang Mahindra Enforcers ngayong alas-7 ng gabi makaraan ang laro ng Batang Pier at NLEX Road Warriors sa alas-4:15 ng hapon sa 2015 PBA Philippine Cup sa Smart Araneta Coliseum.
Puntirya ng San Miguel na magtapos sa Top Two para makamit ang isang outright ticket sa Final Four.
Umiskor ang Beermen sa 101-90 panalo laban sa Star Hotshots noong nakaraang Linggo para sa kanilang ikaanim na panalo para makasosyo ang Alaska Aces sa liderato sa magkatulad nilang 6-1 baraha.
Sina back-to-back MVP June Mar Fajardo, one-time PBA MVP Arwind Santos, Alex Cabagnot, Marcio Lassiter at Chris Ross ang muling aasahan ng San Miguel para sa target na pang-pitong panalo.
Hangad naman ng Mahindra (2-5) ang ikalawang sunod na ratsada makaraang lusutan ang Meralco, 86-83, para wakasan ang kanilang apat na sunod na kamalasan noong nakaraang Sabado.
Samantala, asam ng Globalport (4-3) na maduplika ang kanilang 120-105 paggiba sa Blackwater sa pagharap sa NLEX (4-3).
“Ang target namin is one game at a time,” wika ni Batang Pier mentor Pido Jarencio.
- Latest