Lady Eagles, Bulldogs agawan sa Shakey’s V-League crown sudden death
Laro Ngayon (The Arena, San Juan City)
12:45 p.m. Ateneo vs NU
MANILA, Philippines – Matinding bakbakan ang matutunghayan ngayon sa pagitan ng Ateneo Lady Eagles at National University Lady Bulldogs dahil paglalabanan ng dalawang tinitingalang paaralan sa women’s volleyball ang kampeonato sa Shakey’s V-League Season 12 Collegiate Conference sa The Arena sa San Juan City.
Sa ganap na alas-12:45 ng hapon magsisimula ang inaasahang klasikong tagisan sa dalawang koponan na dinomina ang liga mula sa simula ng kompetisyon.
Nauwi sa ikaw-o-ako ang best-of-three championship series sa ligang inorganisa ng Sports Vision katuwang ang Shakey’s at handog ng PLDT Home Ultera nang angkinin ng Lady Bulldogs ang 25-22, 25-17, 25-17 panalo noong Setyembre 27.
Bago ito ay naunang kuminang ang Ateneo noong Setyembre 20 sa 25-19, 25-13, 25-21 panalo.
Nakikita ng mga coaches ng magkabilang koponan na hindi sa pamamagitan ng straight sets mauuwi ang labanan dahil ibubuhos na ng lahat ng manlalaro ang kanilang angking galing para makuha ang panalo at kilalaning pinakamahusay sa edisyong ito.
“Gusto kong mag-champion and the players, they are determined to win this game and they will give their best,” wika ni NU coach Roger Gorayeb.
“We will bounce back. Willing na willing ang lahat na bumangon,” ani Ateneo assistant coach Parley Tupaz na siyang humahalili sa puwesto ni Thai coach Tai Bundit na nasa isang seminar sa Thailand.
Si Alyssa Valdez ang tiyak na sisipatin ang laro para sa Ateneo matapos malimitahan lamang sa siyam na puntos, malayo sa pinakawalang 20 sa naipanalong Game One.
“Okay naman siya. Pero kailangan din na magkaroon kami ng receive at depensa. Dapat na mapunta rin kay Gizelle (Tan) ang bola para makapag-set siya ng mabuti,” dagdag ni Tupaz.
Maging si Valdez ay naniniwalang makakabawi sila pero dapat ay lahat sila ay naka-focus sa mahalagang laban.
Sa kabilang banda, bukod sa pagdodomina ng mga higanteng sina 6’2 Dindin Manabat at 6’4 Jaja Santiago, hanap ni Gorayeb ang mapigil uli si Valdez.
“Nasa kanya ang crowd kaya kailangang ma-limit siya dahil ang average niya ay nasa 20 points. Mahalaga ang ipakikita ng center blocker namin at dapat na makuha ng libero ko ang mga palo ni Alyssa,” pahabol ni Gorayeb.
Kung ang Ateneo ang magwagi, ito na ang ikatlong Collegiate title ng Lady Eagles matapos ang back-to-back championships sa Season 8 at 9 habang pangalawang titulo ang makukuha ng Lady Bulldogs matapos mag-reyna sa Season 10.
- Latest