Hapones tumalon mula 15th floor ng building, lasog
MANILA, Philippines - Nabasag ang bungo ng isang Hapones matapos itong tumalon mula sa 15th floor sa isang gusali sa Pasay kahapon ng umaga.
Dead-on-the-spot si Yuhei Chiba, 26, na nagtamo ng matinding pinsala sa ulo at katawan.
Sa sketchy report na natanggap ni Senior Supt. Joel B. Doria, hepe ng Pasay City Police, naganap ang insidente alas-8:30 ng umaga sa EGI Building sa panulukan ng Taft at Gil Puyat Avenue ng naturang lungsod.
Ayon sa isang testigong guwardya na si Jessie Reyes, habang siya ay naka-duty nakarinig siya ng kalabog na bumagsak mula sa itaas ng EGI Building.
Kaagad niya itong inalam at dito niya nakita ang duguan at walang buhay na biktima. Ayon kay Doria, nabatid na may reservation ang biktima sa Atrium Hotel, subalit hindi nito tinuloy ang pag-check-in.
Inaalam pa nila ang dahilan nang pagpapatiwakal ng naturang dayuhan.
- Latest